Atalari hasiera Andrey Zvyagintsev errusiarrak emango dio Minotaur lanarekin, eta Nakache eta Toledanoren Juste une illusion filmak, berriz, amaiera. Nanni Morettik Donostian errodatutako eta Irusoin ekoiztetxearen koprodukzioa duen Succederà questa notte ere erakutsiko dute.

Donostia Zinemaldiaren 74. edizioko Perlak sailak nazioarteko hitzordu nagusietan txalotutako 16 film luze hartuko ditu. Hautatutako lan gehienak, hamaika, Cannesko Zinema Jaialditik datoz, eta gainontzekoak Venezia, Berlin eta Sundance bezalako jaialdietatik igaro dira.

Sailari hasiera Andrey Zvyagintsev errusiarrak emango dio Minotaur lanarekin. Cannesen Epaimahaiaren Sari Nagusia jaso duen film hau Claude Chabrolen La femme infidèle obraren egokitzapen librea da, eta enpresaburu arrakastatsu baten gainbehera kontatzen du. Itxiera, berriz, lehiaz kanpo, Olivier Nakache eta Éric Toledano frantziarren eskutik iritsiko da. Frantzian arrakasta handia lortu duen Juste une illusion (Just an Illusion) filmak 1985eko Parisera eramango gaitu nerabe baten begietatik.

Horiez gain, maiatzean Urrezko Palma irabazi zuen Cristian Mungiu errumaniarraren Fjord filma, zuzendari onenaren saria ex aequo irabazi zuten Paweł Pawlikowskiren Fatherland eta Javier Ambrossi eta Javier Calvo espainiarren La bola negra obra, eta aktore onenen sariak jaso zituzten Lukas Dhonten Coward eta Ryusuke Hamaguchiren Soudain (All of a Sudden) proiektatuko dituzte. Cannesen aurkeztu zituzten Na Hong-jin hegokorearraren Hope, Ira Sachs estatubatuarraren The Man I Love, Leah Nelsonen Tangles animaziozkoa, Louis Clichyren Le corset eta Jordan Firstmanen Club Kid lanak ere egongo dira Donostian ikusgai.

Bestetik, Venezian aurki mundu mailako estreinaldia izango duen Nanni Morettiren Succederà questa notte filma Perlak sailean erakutsiko dute ere. Zinemagile italiarrak Donostian errodatu du bere drama erromantiko berria, eta Irusoinek koprodukzitu du. Louis Garrel eta Jasmine Trinca aktoreak protagonista dituen istorioa dakar, Eshkol Nevo idazle israeldarraren Hungry Heart (Lev Raev) ipuin-bilduman inspiratutakoa.

Era berean, Martin McDonagh britainiarrak Wild Horse Nine aurkeztuko du. Sundancen bidea egin ondoren, Beth de Araújo zuzendariaren Josephine iritsiko da Donostiara, eta Olivia Wilderen The Invite komedia ere lehian arituko da.

Film guztiak, itxierakoa izan ezik, Donostia Hiria Publikoaren Saria eskuratzeko hautagai izango dira. Aurten ere, Armani Beauty izango da sailaren babesle nagusia.