Zinema programatzaile lanetan aritu izan da urte luzez Maren Zubeldia, ZINEGOAK – Bilboko LGTBIQ+ Zinema eta Arte Eszenikoen Nazioarteko Jaialdian. Baina Alauda Ruiz de Azuaren, Estibaliz Urresolaren, Paul Urkijoren zein Iciar Bollaínen ondoan ere egin du lan. Zuzendari-laguntzaile izan da aipatutako zinemagileen azken proiektuetan, eta orain, batean zein bestean pilatutako esperientziaren ondoren, berak propio hartu du gidaritza.

Silvina Guglielmotti argentinarrarekin batera, Ultramarino film laburra idatzi du, lau eskutara, baita zuzendu ere. Gizarte tradizioak eta egiturak zalantzan jarri dituzte kostaldeko herri batean girotutako istorio honetan: Zazu da protagonista, bere nortasunaren bila dabilen gaztea.

Lan-talde apartak babestu du Maren, zinemagintza euskal herritarrean erreferente diren profesionalak izan baititu aldamenean. Besteak beste, aurtengo Goya sarietarako hautagai izan diren Itziar Garcia Zubiri (Los domingos film laudatuko ekoizpen bura), Nerea Torrijos (Gaua filmeko jantzitegi burua) edota Drama FX-en (Gaua filmeko efektu bereziak prestatu dituen enpresa) ekarpenarekin jaio da film laburra, eta egun, nazioarteko ibilbide betean da.

KIMUAK 2025 bilduman aukeratu zuten Ultramarino, Doxa Produkzioak ekoiztetxearen proiektua dena, eta Bilboko ZINEBI jaialdian zein Hego Amerikako zenbait txokotan erakutsi dute. Gaur bertan, Malagako Zinema Jaialdian lehiatuko da.

Marenekin hitz egin dugu ZINEAn; zuzendari lanetan ondu duen bere lehen filma barru-barrutik ezagutzeko tartetxoa eskaini digu.