Proiektuak irailaren 1era arte aurkez daitezke, eta ohi bezala, hautatutako sortzaileek zortzi asteko egonaldia egingo dute, bi alditan banatuta.

Donostia Zinemaldiak, Tabakalera Kultura Garaikidearen Nazioarteko Zentroak eta Elias Querejeta Zine Eskolak antolatuta, Ikusmira Berriak egonaldi-programaren 13. edizioan izena emateko azken egunak dira honakoak.

Hain zuzen ere, irailaren 1era arteko epea izango da Euskal Herriko, Espainiako eta beste herrialde batzuetako sortzaileen zinema-proiektuak, Nest sailean parte hartutakoak eta EQZEko ikasleenak aurkezteko. Ondoren, horiek guztiak aztertu eta azaroan jakinaraziko dira bost kategoriatan hautatu diren lanak.

Aurten ere, Tabakalera zentroan egin beharreko zortzi asteko egonaldia bitan banatuko da: proiektua martxan jartzeko sei aste, 2027ko martxo eta apirilean; beste bi aste, Donostia Zinemaldian bertan, zuzendariek beraiek proiektua, ordurako garatu samar izango dutenean. Hala, zinema-industriako ordezkarien aurrean aurkezteko aukera izango dute. Maiatzetik irailera bitarteko tartean, aldiz, bere kontura ariko dira lanean zinemagileak, industriako adituen batzordearen aldetik online tutoretza jasoko duten bitartean.

Deialdiaren oinarriak eta gainerako informazioa programaren orrialdean dago eskuragai.