Lurdes Esqueda irakaslea, Cristian Ruiz kultur ekoizle eta gestorea, Maria Encío eta Julen Zubiete gidoilariak zein ekimen honetako zuzendaria den Marcos Perera arduratuko dira aurtengo edizioko 10 finalistak aukeratzeaz. Behin proiektuak onartuta, aukeratuek bi hilabete luze izango dituzte sorkuntza lanak errodatu eta aurkezteko.

Nafarroako leku turistikoetan kokatutako fikziozko 10 film labur ekoizten laguntzea, erkidegoan turismoa sustatzeko. Horixe izan zuen sortze-helburua Nafarroa Zinemaren Lurraldea lehiaketak, eta horretan dirau oraindik. Bada, adin nagusiko edozein pertsonak osatutako proiektu oro aurkeztu ahal izango da deialdira; gaia eta generoa libreak izango dira, baldin eta istorioa eta ekoizpena antolatzaileek esandako kokapenetako batean eta dagozkion mugarri turistikoetan gertatzen badira: Azkoien, Deikaztelu, Viana, Iruñea, Tafalla, Olazti, Mendaboa, Urdazubi eta Allo.

Sortzaileek abuztuaren 10era arte izan dute gidoi proposamenak bidaltzeko aukera, eta egun, hautespen-batzordea horiek ikuskatzen ari da. Ondoko profesionalek osatzen dute, eta errodaje fasera igaroko diren finalistak erabakiko dituzte:

• Lourdes Esqueda, Ikusizko Kultura eta Analisi Filmikoaren irakaslea Nafarroako Unibertsitateko Komunikazio Fakultatean
• Cristian Ruiz, kultur ekoizle eta gestorea
• Julen Zubiete, gidoilaria eta GIDOI elkarteko bazkidea
• Maria Encío, gidoilaria eta ALMA elkarteko bazkidea
• Marcos Perera, Nafarroa Zinemaren Lurraldea ekimeneko zuzendaria

Behin proiektuak onartuta, aukeratuek bi hilabete luze izango dituzte sorkuntza lanak errodatu eta aurkezteko, azaroaren 16ra arte, hain zuzen. Horiek jendaurrean pantailaratuko dituzte azaroaren 21etik 29ra bitartean, parte hartu duten udalerrietako zinema aretoetan. Antolakuntzaren xedea grabaketarako erraztasun guztiak eskaintzea da, eta beharrezkoa balitz lau lagunentzako egonaldia ordaintzeko prest dira.

Gainera, bigarren fasean, bost sari banatuko dituzte: 2.500 euroko lehen saria, 1.000 euroko bigarren saria, argazki onenaren 500 euroko saria, ikusleen 500 euroko saria, eta epaimahaiaren 500 euroko sari berezia. Gainera, interpretazio onena sarituko duten 250 euroko laguntza banatuko dute.

Irabazleak datorren abenduan, Tafallan egingo den sari-banaketa ekitaldian, iragarriko dituzte.