Donostia Zinemaldiaren abaroan egiten diren industria jarduera garrantzitsuenetako bat da Ikusmira Berriak, talentu zinematografiko emergentea babestu eta sustatu egiten duen programa. Zortzi asteko egonaldian datza, bi fasetan banatuta, eta oro har, zazpi hilabeteko  –martxotik irailera bitartean– laguntza jasotzen du zinemagile hautatu bakoitzak. Lehenbiziko fasean, egoiliarrek sei astez garatzen dituzte beren proiektuak (martxoa eta apirila bitarean), eta adituen batzordeko kideen aholkularitza jasotzen dute. Kideok tutoretza-lanak egiten dituzte proiektuotan, eta, horretaz gainera, garapen-prozesuaren faseak premien arabera lantzen dituzte.

Lehen fasea igarota, irailean, Donostia Zinemaldiarekin batera, itzuli egiten dira egonaldiaren azken bi asteak betetzeko. Denbora horretan, egoiliarren egitasmoetan parte hartu nahi duten profesionalekin lankidetzan aritzeko aukerak lantzen eta sustatzen dira. Egonaldiko bi faseen artean, tutoreek eta erakundeek aholkularitza eta laguntza ematen diete proiektuen garapenari.

2015an sortua, hamargarren urteurrena ospatu du ekimenak 2025ean. Dagoeneko finkatuta egon arren, indartsu hazten jarraitzen du. Zenbakiei erreparaturik, 1.800 proposamenek baino gehiagok eman dute izena, eta, guztira ikus-entzunezko 56 proiekturi eskaini zaie babesa; horietatik 28 amaitu dira, eta zinema-jaialdien nazioarteko zirkuitu zabal batean hautatu dituzte: Donostia Zinemaldian, Venezian, Cannesen, Belinalen, DocLisboa jaialdian…

Urteurrena aitzakia gisa hartuta, programaren arduraduna den Maialen Francorekin elkartu gara. Urteotako bilakaeraz, helburuez, kasu arrakastatsuenez… aritu gara hizketan.