Gaur, 21:30ean hasita, Paul Urkijok zuzendutako lan fantastikoa proiektatuko dute, Armentiako zelaietan. Antolatzaileek gaualdiaz gozatzeko tapakia edo kanpin-aulkia eraman dezatela gomendatu die herritarrei.

Udako iluntzeak zinema onenarekin argitzeko asmoz pentsatutako Gasteiz, Zinema Hiria zikloaren baitan, Paul Urkijoren Gaua pantailaratuko dute, gaur, hirian. Fantasiazko eta errealitate historikoaren artean dabilen filma dakar filmak, zehazki, euskal mitologiaren gaueko munduan murgilduko da XVII. mendean girotutako istorio baten bidez. Gaueko izakien mundu mitologikoa eta landa-eremuko sineskeriaren iruditeria uztartuko ditu misterioz, emozioz eta epikaz betetako unibertso bat sortuz.

Saioa Armentiako zelaietan izango da, 21:30ean hasita. Sarrera doan da, eta antolatzaileek gaualdiaz gozatzeko tapakia edo kanpin-aulkia eraman dezatela gomendatu diete herritarrei. Hala ere, gogorarazi dute arazo fisikoak dituzten pertsonentzat aulkiak bertan izango direla prest. Eguraldi txarra eginez gero, saioa atzeratu egingo da.

Filmaren nondik norakoak

Sorgin ehiza betean, Kattalin, senarrarengandik ihesi, bere baserritik aterako da gauaren erdian. Baso beltzean galduko da eta bere atzetik segika duen presentzia bat sentituko du. Ihesean dabilela hiru emakume maitagarrirekin topo egingo du. Hauek, arropa garbitu bitartean, beldurrezko ipuinak eta herriko esamesak partekatzen dituzte. Kattalinen harridurarako, bera izango da istorio horien protagonista.

Sitgesko Zinema Fantastikoaren Nazioarteko Jaialdiaren 58. edizioan izan zuen mundu mailako estreinaldia, eta Donostiako Fantasiazko eta Beldurrezko Zinemaren 36. Astea inauguratu zuen gero. Datozen egunotan IFFR – Rotterdamgo Nazioarteko 55. Zinema Jaialdian lehiatuko da ere. Goya sarietarako hiru izendapen ditu, arlo teknikoetan.