Бэҕэһээ “Ходуһа хоһууттара” өрөспүүбүлүкэтээҕи илии хотуурунан от охсуутугар өрөспүүбүлүкэтээҕи күүлэй Мэҥэ Хаҥалас улууһун Догдоҥо нэһилиэгэр түмүктэннэ. Манна кыттыбыт, тэрээһини  көрбүт дьон сүрдээҕин астынан тарҕаспыттар.

— Биһиги сирбитигэр-уоппутугар Күүлэй тэриллэн, олус сэргэхсийдибит. Күүлэй кэмигэр ыччат миниистирэ Петр Шамаев кыттыылаах былаһааккалар тэрилиннилэр. Биһиги нэһилиэкпититтэн төрүттээх аатырбыт асчыт Николай Атласов маастар-кылааһын кэрэхсээтилэр. Биэс хамаанда састааптаах кэрэ аҥаардар балык миинэ, алаадьы, саламаат астааһыҥҥа холонууларын Доллу нэһилиэгиттэн кэлбит Николай Сивцевтиин сыаналаатыбыт. Ону тэҥэ ходуһаҕа Иннокентий Павлов салайааччылаах улууспут быраастара анал мобильнай массыыналаах кэлэн, ыалдьыттар доруобуйаларын туругун толору чинчийдилэр. Өрөспүүбүлүкэтээҕи “Ходуһа хоһууттара” күүлэй нэһилиэкпит улуу олоҥхоһута Степанов Николай Иванович-Ноорой төрөөбүт Тураахтаах алааһыгар буолбутун бэлиэтээн, улууспут салайааччыларыгар, тэрийээччилэргэ махтанабыт, — диэтэ Догдоҥо нэһилиэгин баһылыга Петр Сивцев.

Петр Дмитриевич илиинэн от охсуутун көҕүлүү Хаҥалас улууһуттан кэлбит СӨ Судаарыстыбаннай Мунньаҕын (Ил Түмэн) дьокутаата  Тихон Николаевич Скрябин атыттарга үтүө холобуру көрдөрбүтүн бэлиэтээтэ. Өссө кини муҥутуур кыайыылаах буолбут. Ону тэҥэ оскуола үөрэнээччилэрэ кыттыбыттара инникитин төрүт дьарыкпыт сүппэтигэр төһүү күүс буолуо диэн эрэнэр.

10-гар диэри саастаах уолаттарга Эрсан Окороков (Моорук) бастаабыт. Алексеев Роберт (Эмис) иккис миэстэни ылбыт. 11-13 саастаах уолаттарга Ярослав Петров (Мэлдьэхси) бастаабыт, иккискэ – Колесов Арылхан (Хара), үһүскэ – Айаан Петров – үһүс. 14-17 саастаахтарга Андриан Петров (Мэлдьэхси) тэҥнээҕин булбатах. Иккискэ – Айылхан Окороков (Моорук), үһүскэ – Уйгулаан Егоров (Майа).

18-39 саастаах эр дьоҥҥо кыайыылаах Данил Тимофеев (Амма). Иккискэ – Иван Тихонов (Моорук), үһүскэ – Тихон Тимофеев (Амма).

40-59 саастаахтарга 1-кы – Тихон Скрябин (Хаҥалас), 2-с – Максим Забровскай (Мэҥэ Хаҥалас),   3-с – Юрий Ксенофонтов (Мэҥэ Хаҥалас).

60 үөһээ саастаахтарга – Илья Пестерев (Амма) бастаата, Афанасий Сивцев (Мэҥэ Хаҥалас) – иккискэ, үһүскэ – Владимир Федоров (Мэҥэ Хаҥалас).

18-39 саастаах дьахталларга Евдокия Бубякина (Амма) кыайыылаах буолла. Иккискэ – Федора Алексеева (Амма), үһүскэ – Амгалена Кузнецова (Мэҥэ Хаҥалас). 40-49  саастаах дьахталларга Анна Скрябина кыайда. Иккискэ – Наталья Шестакова, үһүскэ – Татьяна Неустроева. Үһүөн мэҥэ хаҥаластар.  Ходуһа сонуна итинник.

Хаартыска: П.Сивцев ылан тиксэрдэ