Таҥас сууйар массыына барабаанын мэлдьи аһара элбэх таҥаһынан толоруу, сөптөөҕө суох бырагырааманы талыы уонна фильтры кэмигэр ыраастаабат буолуу хойут массыына алдьанарыгар тиэрдиэн сөп. Бу туһунан «ВсеИнструменты.ру» онлайн-гипермаркет эспиэрэ Александра Чихринова кэпсээтэ.

«Таҥас сууйар массыына төһө өр үлэлиэхтээҕэ угуллар таҥас кээмэйиттэн, бырагырааманы таларыттан, фильтры, лотогу, эрэһиинэни уонна бараабаны төһө ыраастыыргытыттан тутулуктаах», — диэн Чихринова Life.ru интервьютугар эттэ. Кини этэринэн, маассыынаны сыыһа туһаныы тиэхиньикэ түргэнник алдьанарыгар уонна үлэтин көдьүүһэ намтыырыгар тиэрдэр.

Сүрүн алҕастар

Александра Чихринова бэлиэтииринэн, таҥас сууйар массыына алдьанарын сүрүн төрүөттэрэ:

1. Барабааны аһара толоруу. Наһаа элбэх таҥас подшипниктарга, амортизатордарга, приводной эрэмиэҥҥэ уонна мотуорга улахан ноҕоруусканы оҥорор.
2. Наһаа аҕыйах таҥаһы сууйуу. Массыына кураанах кэриэтэ үлэлиирэ эмиэ алдьаныыга тиэрдиэн сөп. Тоҕо диэтэххэ, итинник түгэҥҥэ сууйуу элбэхтэ хос-хос хатыланар, ол түмүгэр массыына түргэнник эргэрэр — уу, уот элбэх баранар.
3. Сыыһа бырагырааманы талыы. Күүскэ киртийбит таҥаска кылгас бырагырааманы туруоруу – эмиэ сыыһа дьаһаныы. Таҥас үчүгэйдик сууйуллубат, онон иккистээн сууйарга күһэллэҕин. Түмүгэр массыына элбэхтик үлэлиир.
4. Сууйар сириэстибэни (бороһуогу) наһаа элбэҕи кутуу. Боруһуогу эбэтэр гели аһара кутуу таҥас ыраастык сууйулларыгар көмөлөспөт. Ордуга лотокка, патрубкаларга уонна уу тоҕор турбаларыгар сөҥөн, бүөлэнэн хаалар. Ол уу сытыйарыгар уонна куһаҕан сыт тахсарыгар тириэрдэр.
5. Илиинэн сууйарга аналлаах боруһуогу туһаныы. Маннык боруһуок күүскэ күүгэннэнэр, ол массыына үлэтин алдьатыан сөп.

Хайдах көрө-харайа сылдьыахха сөбүй?

• Эрэһиинэтин ыраастааһын. Хас сууйуу кэнниттэн массыына аанын эрэһиинэтин ууттан, киртэн уонна кыра бөхтөн-сыыстан ыраастаныахтаах, сотуллуохтаах.
• Барабааны ыраастааһын. Икки ыйга биирдэ барабааны ыраастыыр эрэсиими холбуур эбэтэр таҥаһа суох үрдүк температураҕа үлэлэтии кирдээх ууну суурайар.
• Фильтры ыраастааһын. Уу тахсар насос фильтрын икки-үс ыйга хайаан да ыраастыыр ордук. Фильтр бүөлэннэҕинэ уу мөлтөхтүк барар, онтон тиэхиньикэ ноҕуруускаланан үлэлиир.
• Лотогу сууйуу. Боруһуок, гель тобохторо лотокка хаалбытын ыйга биирдэ сылаас уунан сууйуллуохтаах.

Тиэхиньикэни ыраастыыр кэм кэлбитин маннык бэлиэлэр этэллэр: сууйуллубут таҥаска боруһуок хаалбыт буоллаҕына уорнна барабааҥҥа эбэтэр лотокка салахайдаах сөҥүү үөскээтэҕинэ.

Болҕойуҥ!

Албакааттар федеральнай балаататын сүбэһитэ Ольга Власова иһитиннэрбитинэн, улахан тыаһы таһаарар малы-салы (холобур, миксер эбэтэр куукуна комбайна) туттуу иһин  ыстарааптаныахха сөп. Түүҥҥү өттүгэр таҥас сууйар массыына тыаһа эмиэ онно киирсэр.

Сокуон быһыытынан, бигэргэтиллибит нуорматтан тахсар ханнык баҕарар тыас-уус сокуону кэһиинэн ааҕыллар. СанПиН 2.1.2.2645-10 VI-с салаатыгар сөп түбэһиннэрэн, күнүскү кэмҥэ тыас таһыма 55 дБА, оттон түүн – 45 дБА үрдүө суохтаах.