Ааспыт сууккаҕа баһаарынайдар күүстэринэн Дьокуускай куорат уокуругар, Горнай, Нам, Хаҥалас, Уус-Алдан, Өлүөхүмэ, Томпо, Эдьигээн, Эбээн-Бытантай, Дьааҥы, Кэбээйи, Нерюнгри уонна Үөһээ Бүлүү улуустарыгар уопсайа 2688,9 гектар иэннээх сиргэ турбут 17 ойуур баһаарын умуруордулар. Баһаары умуоруу үлэтигэр 676 киһи уонна 39 анал тиэхиньикэ кыттыыны ылла.

СӨ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы, өрөспүүбүлүкэ сүрүн лесничэйэ Андрей Коноплев от ыйын 12 күнүнээҕи туругунан, суукка саҕаланыытыгар 14 муниципальнай оройуоҥҥа 37 701,7 га уопсай иэннээх 37 ойуур баһаара баарын иһитиннэрдэ.

• 21 493,7 га уопсай иэннээх 23 ойуур баһаарын умуоруу үлэтэ салҕанар.
• Мэҥэ-Хаҥалас, Уус-Алдан, Таатта, Алдан уонна Амма улуустарыгар 5 103,6 га иэннээх 7 ойуур баһаарын умуруордулар.
• Хонтуруолланар зонаҕа, ыраах уонна тиийэргэ уустук сирдэргэ, 14 ойуур баһаара турар. Уопсай иэннэрэ – 16 208 га. Бу баһаардар ыраахтарынан уонна тиийэргэ уустуктарынан, ЫБС хамыыһыйатын быһаарыытынан умуоруу үлэтэ тохтотулунна.

15 лесничество сиригэр-уотугар 12 салгын суудуната уонна 7 Ми-8 бөртөлүөт салгынтан кэтээн көрүү үлэтин ыыталлар. 20 лесничествоҕа сиринэн кэтээһин барар. Харыстанар зонаҕа ойуур баһаардарын бастакы сууккаҕа умуоруу көдьүүһэ 92,28% тэҥнэһэр.

Андрей Коноплев бэлиэтээбитинэн, от ыйын 10 күнүттэн Ил Дархан ыйаахтарынан Саха сирин сиригэр-уотугар эрэгийиэннээҕи таһымнаах Ыксаллаах быһыы-майгы эрэсиимэ уонна уоттан сэрэхтээх буолуу анал эрэсиимэ киллэрилиннилэр. Алдан, Эдьигээн, Таатта, Томпо уонна Уус-Маайа улуустарыгар муниципальнай таһымнаах ЫБС эрэсиимэ тыытыллыбакка хаалар.

Айылҕа баһаарын буллугут да, тутатына ойуур хаһаайыстыбатын эрэгийиэннээҕи диспетчерскэй сулууспатыгар 44-74-76 нүөмэргэ эбэтэр 8-800-100-94-00 нүөмэригэр биллэрэргитигэр сүбэлииллэр.