Бүгүн, от ыйын 12 күнүгэр, пааркаҕа,  Оһуокай искибиэригэр Оһуокай ыһыаҕа үрдүк таһымнаахтык ааста.

Пааркаҕа этээччилэри таһынан, олус элбэх киһи кэлэн тоҕуоруста. Оруобуна күнүс 1 чаастан «Оһуокай» түмсүү үтүөлээх этээччитэ Петр Семенович Григорьев аал уоту оттон, кытыт биэ кымыһынан, арыылаах алаадьынан айах тутан, Үрүҥ Аар Тойон баһылыктаах Үөһээ Сырдык Айыылартан, сирдээҕи үтүө иччилэртэн көрдөһөн алгыстаата. Алгысчыт тылын ылынан күммүт чаҕылыччы көрөн, тыала тохтоон, уоскуйан, күн-дьыл туран биэрдэ.

Алгысчыт кэнниттэн Дархан этээччи Горнайтан Прокопий Федоров киэҥ түһүлгэни таһаарда. Кини кэнниттэн «Таатта» түмсүү аатыттан Л.А.Аввакумова «Таатта» МТ баһылыга Айаал Бурцев аатыттан бочуотунай грамотаны СР «Оһуокай» түмсүүтүн салайааччытын аатыгар А.Д.Даниловка -Дьулуур Хааҥҥа махтанан туран, бу үөрүүлээх Оһуокай ыһыаҕар туттарар наадалааҕын эттэ.

Бүлүү улууһуттан «Оһуокай» түмсүү салайааччыта, Ил Дархан стипендиата С.Т.Иванова быйыл Бүлүү улууһугар олоҥхоһут В.О.Каратаев уонна олоҥхоһуттар, тойуксуттар түмсүүлэрэ 35 сылыгар аналлаах үбүлүөйдээх мэтээли туттаран туран, «Оһуокай» түмсүү салайааччыта А.Д.Даниловка, түмсүү бэрэссэдээтэлин солбуйааччы А.Л.Тарскайга, М.Т.Николаеваҕа махтанан, түмсүү тэрээһиннээхтик үлэлиирин бэлиэтээтэ, инникитин бииргэ кэскиллээхтик үлэлииргэ махтанна.
Быйыл  үчүгэйдик үлэлээбит түмсүү чилиэннэригэр СР Правительсвотын бэрэссэдээтэлин солбуйааччы С.В.Местников, СР культураҕа уонна духуобунаска миниистирэ А.И.Ноев бочуотунай грамоталарын Дархан этээччи Лариса Ивановаҕа, үтүөлээх этээччи Антонина Алексееваҕа, СР норуот айымньытын киинин бочуотунай грамотатын Дархан этээччилэр Виталий Никифоровка, Станислав Ивановка о.д.а. элбэх көхтөөх дьоммутугар Александр Лаврентьевич туттарда.
Дархан сүбэтин бэрэссэдээтэлэ В.В.Хорунов быйылгы сыл Дархан этээччилэригэр Прокопий Федоровка, Айта Васильеваҕа, Данил Пестряковка, Розанна Герасимоваҕа, Хабырыыл уола Мэҥкэр Сэмэҥҥэ дастабырыанньаны уонна Дархан бэлиэтин түөстэригэр ииллэ. Маны тэҥэ быйылгы ыһыахха финалга киирэн үтүөлээх ааты ылбыт Ньургун Давыдов тутта.
Оһуокай түһүлгэтин Дархан этээччилэр төрүттээтилэр. Ырыанан эҕэрдэлэри дуоһуйа иһиттибит. Үтүөлээх уонна саҥа этээччилэр эмиэ үөрэ-көтө түһүлгэни төрүттээтилэр.

Марта Николаева