Саха сирин сылгыһыттара уонна «Симэх» галерея маастардара Монголияҕа ыытыллар Наадам-2026 национальнай бырааһынньыкка саха атын үрүҥ көмүстэн оҥоһуллубут толору симэҕин көрдөрдүлэр. От ыйын 13 күнүгэр биир дойдулаахтарбыт аан дойду араас муннуктарыттан мустубут аттаах дьон улахан параадыгар кыттыахтара, диэн ЯСИА иһитиннэрэр.

«Бэҕэһээ алгыс сиэрин-туомун ыыттыбыт, олус элбэх көрөөччү муһунна. Саха атын толору үрүҥ көмүс симэҕин көрдөрдүбүт, оттон сарсын аан дойду араас дойдуларыттан кэлбит 10 400 аттаах киһи параадыгар кыттыахпыт. Мин аҕабыныын Саха сирин дэлэгээссийэтин састаабыгар сылдьабыт, онно «Симэх» галерея маастардара бааллар. Дэйбиир оҥорууга маастар-кылаастары ыытабыт. Саха Далбар хотуттара тикпит ыҥыырдарын уонна чаппараахтарын билиһиннэрдибит. Хомойуох иһин, саха аттарын илдьэ кэлэр кыах суох этэ. Биһиги бу сырыыбыт сүрүн сыала-соруга — саха норуота сылгы иитиитин сайыннарыыга дьулуһарын көрдөрүү», — диэн Саха сирин биллиилээх сылгыһыта Дугуйдаан Винокуров ЯСИА-ҕа кэпсээтэ.

Устуоруйаҕа хаалбыт айан

Санатар буоллахха, Дугуйдаан Винокуров Арассыыйа устуоруйатыгар саамай уһун «Тымныы полюһуттан Москваҕа диэри» атынан эспэдииссийэтинэн киэҥник биллибитэ. Өймөкөөнтөн Москваҕа диэри айана аҥаардас сыл кэриҥэ уһаабыта. Новосибирскай аннынан сылгыһыт ата хараҕын былдьаппыта, онон кини дойдутугар төннөргө күһэллибитэ. Ол да буоллар, Винокуров айанын тохтоппокко салҕаабыта уонна уопсайа 11 тыһыынчаттан тахса км ааспыта.