Дьааҥы улууһугар Дьааҥы өрүскэ ардахтан үөскээбит халаантан сылтаан, быыһааччылардаах бөртөлүөт көттө. Бу туһунан Саха сирин Быыһыыр сулууспата иһитиннэрэр.

Дьааҥы өрүс үөһээ тардыытыгар балаһыанньа уустугурда – уу таһыма үрдүүрэ бэлиэтэнэр.

Бүгүн, от ыйын 12 күнүгэр, «Полярные авиалинии» хампаанньа бөртөлүөтэ Баатаҕай бөһүөлэгиттэн Суордаах сэлиэнньэтин диэки көттө.

Бөртөлүөт иһигэр Саха сирин быыһыыр сулууспатын Дьааҥытааҕы көрдүүр-быыһыыр этэрээтин быыһааччылара мотуордаах оҥочолоох баар буолуохтара. Кинилэр наада буоллаҕына, дьону көһөрөр үлэни ыытыахтара.

Миэстэтигэр балаһыанньаны сыаналааһын кэнниттэн, салгыы дьаһанар туһунан быһаарыы ылыллыаҕа. Балаһыанньаны СӨ Гражданскай оборуона дьыалаларыгар уонна нэһилиэнньэ олоҕун куттала суох буолуутун хааччыйыыга министиэристибэтэ уонна өрөспүүбүлүкэ быыһыыр сулууспата хонтуруоллууллар.