20/08/2026 Actualizado a las 13:02h.

Getariako Udalak EHNERGIA energia komunitateen sare europarrean bazkide laguntzaile gisa parte hartzea eta EH KOM Kooperatiba Sozietatearekin bazkidetza-hitzarmena sinatzea onartu ditu.

Bi erabakiek helburu bera dute: energia eta telekomunikazio burujabetza indartzea, tokiko lankidetza sustatzea eta herritarren mesederako proiektu berriak garatzea.

EEHNERGIA tokiko energia komunitateen beharretatik sortutako sarea da, haien arteko lankidetza, ordezkaritza eta sostengua indartzeko. Horren bidez, energia komunitateek prestakuntza, aholkularitza eta proiektu estrategikoetan laguntza izango dute, betiere trantsizio energetikoaren protagonista izaten jarrai dezaten. Getariako Udalak 2.000 euroko ekarpena egingo du bazkide laguntzaile gisa.

EH KOMekin sinatutako hitzarmenak telekomunikazioen arloan lankidetza sustatuko du, ezagutza partekatuz eta arrakala digitalari aurre egiteko tresnak indartuz. Helburua da herritar guztiek kalitatezko konektibitatea eta komunikatzeko eskubidea bermatzeko bidean aurrera egitea.

Horretarako, Getariako Udalak 1.500 euroko ekarpena egingo dio kooperatibari.

Bi ekimenekin, Getariako Udalak energia eta telekomunikazio burujabetzaren aldeko konpromisoa sendotzen du, lankidetza, berrikuntza eta jasangarritasuna oinarri hartuta.