Zuzendaria: Danny DeVito

Urtea: 1996

Herrialdea: AEB

Iraupena: 88 min.

Generoa: Komedia | Fantastikoa

1996an estreinatu zen Matilda filma, Danny DeVitok zuzendu eta ekoitzia, eta Roald Dahl idazlearen izen bereko eleberrian oinarritua. Umorea, fantasia eta kritika soziala uztartzen dituen istorio hunkigarria da honakoa, eta hiru hamarkada igaro diren arren, filmak indarrean jarraitzen du, hezkuntzari, familiari eta haurren ahalduntzeari buruz egiten duen gogoetagatik.

Istorioaren protagonista Matilda Wormwood da, aparteko adimena eta irakurzaletasun handia dituen neska. Bere gurasoek ez dute haren gaitasunak baloratzen, eta etxean etengabe gutxiesten dute. Eskolan, Miss Honey irakaslearen babesa aurkitzen du, baina, aldi berean, Miss Trunchbull zuzendari zorrotz eta beldurgarriaren aurka egin behar izaten du. Testuinguru horretan, Matildak gaitasun telekinetikoak dituela deskubritzen du, eta ahalmen horiek bidegabekeriari aurre egiteko erabiliko ditu.

Mara Wilson gogoangarri batek antzeztu zuen Matilda, eta aktore-zerrenda Danny DeVitok, Rhea Perlmanek, Embeth Davidtzek eta Pam Ferrisek osatu zuten dute, bakoitzak istorioaren garapenean funtsezko pertsonaiei bizia emanez. Hala, filmak hainbat gai jorratzen ditu, besteak beste, hezkuntzaren eta irakurketaren garrantzia, jakin-min intelektuala, ausardia eta justizia. Horrez gain, familia-ingurune zail batean hazten den haur baten ikuspegitik, babesaren, enpatiaren eta norberaren gaitasunetan sinestearen balioa azpimarratzen ditu.

Estreinaldian leihatilan arrakasta mugatua izan bazuen ere, denboraren poderioz ikusleen eta kritikaren aitortza lortu du. Gaur egun, familia-zinemaren erreferentziazko lanetako bat da, umorea, fantasia eta mezu inspiratzaileak uztartzen dituelako.

PRIME VIDEO plataformaren eskaintzan dago eskuragarri.