‘Euskal emakume zinemagileen ikusezintasunaren genealogiak: Yannick Bellonetik eta Kimuak programaren lehenbiziko belaunaldira (1947-1998)’ doktoretza-tesia aurkeztu du Olatz Ovejero Alfonso ikerlari eta zinemagile nafarrak. Zinemagintzan eta feminismoan erreferente diren Iratxe Fresneda eta Tania Arriaga ikerlarien babespean ondu du, Euskal Herriko Unibertsitatean.

Kanonaren kontzeptua zalantzan jarriz, eta Ursula K. Le Guin idazlearen “poltsaren metafora” baliatuz, euskal emakume zinemagileen genealogia bat dakar ikerketak: historiografiaren, artxiboaren eta memoria kulturalaren eremuetan zinemagile horiek pairatu duten ikusezintasuna aztertu du. Hala, Ovejeroren lanak agerian utzi du euskal zinemagileen bazterketa ez dela halabeharrezkoa izan, botere-egituren sintoma errepikatua baizik.

Egun, egindako tesian oinarritutako Ikusi-makusi film laburra bukatzen ari da. Larrabetzun errodatu du, Geuretik Sortuak egitasmoaren baitan; bertako eskolako haurrak zinemagile bilakatu ditu.

Iruñeko Baluarte jauregian elkartu gara Olatzekin, eta bere ikerketari buruzko xehetasunak kontatu dizkigu.