Ин сарбози 23-сола рӯзи 27-уми апрел худро ба дарё партофт ва то ҳол ҳеч нишоне аз ӯ пайдо накардаанд. Мақомот қазияро расман шарҳ намедиҳанд.

Қурбонгул Ашурова, модари Шаҳбоз Ҷонмаҳмадзода рӯзи 29-уми апрел дар суҳбат бо Радиои Озодӣ гуфт, писараш пеш аз оне, ки худро ба об афканад, ба ӯ занг зада буд. Ӯ ба модараш гуфтааст, агар хатое карда бошад, узр мехоҳад. "Дар телефон гуфт ки агар дар ҳаёт яке хато карда бошам, "очаҷон маро бубахш", се бор гаштаву баргашта ҳаминхел гуфт, ки очаҷон агар ягон хато карда бошам, маро бубахш,"--гуфт модари сарбоз.

Наздикони Шаҳбоз Ҷонмаҳмадзода дар бораи сабабҳои марги ӯ ошкоро суҳбат намекунанд. Намояндагони Вазорати мудофиа ҳам, ки дар ҷойи ҳодиса буданд, аз шарҳи ҳодиса худдорӣ карданд. Як манбаи огоҳ аз тафтишот ба Радиои Озодӣ гуфт, ду фарзия; бадрафторӣ дар қисми ҳарбӣ ва мушкили хонаводагӣ ҳамчун сабабҳои эҳтимолии даст ба худкушӣ задани сарбоз таҳқиқ мешаванд.

Гузориши видеоиро инҷо тамошо кунед:

Ба гуфтаи наздиконаш, Шаҳбоз Ҷонмаҳмадзода дар яке аз қисмҳои ҳарбии Вазорати мудофиа дар канори Душанбе хизмат мекард ва барои даҳ рӯз рухсатӣ гирифта, ба хонаашон дар ноҳияи Файзобод рафт. Ин сарбоз 28-уми апрел мебоист ба маҳалли хидматаш бармегашт, аммо як рӯз пеш бо баҳонаи ороиши мӯйи сар аз хона баромада ба шаҳри Ваҳдат омад ва худро ба рӯдхона партофт.

"Дар бораи саломатиаш мегуфт, ки гурдаҳоям дард мекунад. Худам гуфтам ки аз дорухона ягон дору биёр, хӯр, ки соз шавӣ,"--гуфт модари сарбоз.

Шаҳбоз Ҷонмаҳмадзода соле пеш издивоҷ карда, як тифли панҷмоҳа дорад. Талошҳои наҷотдиҳандагон барои пайдо кардани ин сарбоз то ин лаҳза бенатиҷа аст. Пуроб шудани дарё дар фасли баҳор ва омадани сел кори наҷотдиҳандагонро мушкил кардааст.

Маргумири сарбозон дар қисмҳои ҳарбии Тоҷикистон моҳи апрел доғ шуд. Дар ин моҳ ҳадди ақал марги се сарбоз расонаӣ шуд. Наздикони бархе аз ин сарбозон аз шароити нохуб дар қисмҳои ҳарбӣ ва озори сарбозон шикоят карданд. Мақомот мегӯянд, вазъ дар қиёс ба солҳои пеш беҳтар шудааст, аммо хабарҳои ахир ин иддаоро зери суол мебаранд.