23/01/2026 a las 17:28h.

Bacotexo, la banda de rock n'eonaviego que formen Ricardo Saavedra (baxu y voz), Marcos Nogueiro (guitarra, voz) y Dani García (batería), acaben de sacar el so quintu discu: 'Hai úa lluz que sempre acaba salindo' (Boomerang), un trabayu, grabáu, como ye'l so vezu, nos estudios Tutu de Corvera, qu'entama un ciclu nuevu tres los sos dos anteriores álbumes conceptuales y que se caltién ente la señaldá y el vitalismu, col sellu propiu del tríu.

Dende A Caridá, onde vive, Saavedra desplica que'l títulu «condensa el concepto xeneral que queríamos trasmitir cuas cancióis. Esa idea de que vas avanzando na vida y vas perdendo paraísos, pero que sempre hai que ter fe en qu'os cambeos son pra miyor y qu'igual que se perden paraísos, hai outros novos que van saliendo y que se van atopando. É precisamente esa luz que sempre acaba por salir». ,

Alrodiu de si ésti ye'l so trabayu más lluminosu, el baxista de la banda apunta que «somos un grupo de clarescuros y el disco tamén o é. Entonces, partindo d'úa realidá na qu'os tres nos últimos anos sufrimos pérdidas distintas y cambeos vitales importantes, queríamos chegar á convicción emocional de que, a pesar de todo, merece a pena estar vivos, ¿non? Vou citar úa frase d'Ilegales, xa que morréu hai pouco Jorge Martínez: 'El mundo es basura/pero me gusta estar vivo'. Hai momentos escuros, pérdidas, y paraísos que nun volven, pero hai daqué sempre que hai que buscar».

En cuantes a la dimensión netamente musical del álbum, con una sonoridá qu'abre la paleta instrumental avezada de Bacotexo, Saavedra caltién que «desque empezamos plantiámonos fer un grupo de rock con formato de trío, pero en realidá por as nosas influencias y a música qu'escuitamos, al hora de compoñer hai cancióis que necesitan más instrumentación pra desarrollarse. Y neste qu'é un disco de contrastes necesitábamos el axuda de xente que toca outros instrumentos pra atopar a sonoridá axeitada a cada tema». Nesi sen, cuenten coles collaboraciones de Ross Gala al vigulín, Sam Rodríguez nos teclaos y David López a los metales. El resultáu, en comparanza con otros trabayos de Bacotexo, son canciones más directes y qu'algamen una amplia gama sonora.

Parez inevitable referise a cómo condiciona a la banda el fechu d'espresase n'eonaviego. Al respective, Saavedra sorraya la independencia del grupu: «Pra nosoutros a música é vital peró nun vivimos d'ella. podemos fer o que nos día a gana. Por eso podemos fer el disco que quíramos cantando na nosa llingua y a música que nos apeteza ou que nos pida el corpo encada momento, y del xeito que quíramos.porque nun tamos pendentes de ningún xeito de ser comerciales ou de gustar más ou menos. Al cabo, el nun vivir da música permítenos esta especie d'exercicio de honestidá», afita. Polo que toca a la propia situación de la so llingua, el músicu y tamién escritor nella, denuncia que «a nosa diglosia é inda pior qu'a del asturiano. Tía qu'haber paridá llingüística en Asturias y tamos mui llonxe d'eso. Y con paridá refírome a qu'el asturiano y el eonaviego vayan por a mao de verdá en todo: nos mesmos tempos, posibilidades y recursos. Eso nun é así» .

Al pesar d'esi contestu negativu, el so apueste sigue tan firmecomo al entamu: «Decidimos qu' íbamos cantar na llingua das nosas familias porque é natural y porque podería ser interesante a nivel estético. Y de paso porque a música pode ser úa ferramenta mui útil pra chegar á xente y dignificalla. Y d'eso tamos convencidos y mui orguyosos del noso llabor, claro».