30/01/2026 a las 17:04h.

L'abondosu fondu documental reuníu pola Fundación Valdés Salas, xunto a la Universidá d'Uviéu, nel so Proyectu Fernán-Coronas siguedando frutos nel so enfotu de divulgar la monumental obra del escritor y sacerdote valdesanu Padre Galo (1884-1939), inédita na so inmensa mayoridá. Ún de los más resaltables, la Biblioteca Fernán-Coronas, que coordina el profesor Xulio Viejo y edita el sellu Trabe acaba de publicar dos nuevos poemarios inéditos del autor de Cadavéu. Trátase de 'Montañegas', nuna edición a cargu de Xaime Martínez y de 'Témporas d'eiquí', n'edición d'Elena Álvarez.

Alrodiu del primeru d'ellos, Martínez, doctor en Filoloxía y graduáu conMinor n'Asturianu, desplica a ALITAR que «cronolóxicamente ye cenciellu de datar porque bona parte de los testos que xuntó nesta serie poética (dexó una montonera d'elles qu'él mesmu llamaba llibros)tán fechaos nos años 34 y 35, y refiérense munchos d'ellos a fechos como la Revolución d'Ochobre.L'otru factor que val pa datalos ye la propia llingua del Padre Galo, que ta bien periodificada por Antón García o Adrián Fernández Expósito, y que ye coherente cola qu'emplega a partir de 1933». Esta temática, na que'l cura cadavedanu espresa les sos inquietúes espirituales respective a los sucesos revolucionarios ye ún de los afayos qu'aporta la so publicación. Otru, el de que ye un exemplu del descubrimientu por parte de los investigadores del Proyectu Fernán Coronas de que la obra lliteria qu'hasta entós conocíemos correspuéndese básicamente cola década de los años 20 y el gruesu de los testos conservaos nel arquivu de la Fundación Valdés Salas, ye de la década siguiente, la última que diba a vivir el poeta.

Sobre'l sentíu d'esti llibru, Xaime Martínez señala que 'Montañegas' «constrúise alredor de la imaxe de la montaña y la so ascensión, como una alegoría de la ascensión espiritual, d'una manera nun sé si tanto mística, pero sí ascética. Y dientro d'esa imaxinería, les montañes funcionen casi como refuxos d'esos bienes espirituales que'l Padre Galo consideraba que taben en peligru pola confusión.Fala en dellos poemes de que los tesoros tienen de volver a guardase nes montañes o que tienen que baxar d'elles les tropes espirituales a recuperar el territoriu. Ye dicir que pa él la montaña conviértese nuna especie de resistencia al anticlericalismu de la revolución». En cualaquier casu en comparanza con otros textos suyos que conocemos de la guerra civil con emponderances al bandu subleváu, equí «lo espiritual predomina enriba lo político y si esto apaez ye siempre en relación a la espiritualidá».

En cuantes al otru poemariu, 'Témporas d'eiquí', Álvarez, graduada en Llingua Española y les sos Literatures, tamién con Minor n'Asturianu, fexo el so trabayu fin de grau alrodiu d'estos poemes, de los qu'afirma «tienen como tema principal el pasu del tiempu, ya dende'l mesmu títulu qu'alude a les témpores, los ciclos litúrxicos venceyaos a les estaciones. Nos sos versos FernánCoronas va moviéndose al través d'elles, la primavera: poemes alegres, llenos de flores y paxarinos, o la seronda y l'iviernu, más tristes, con tola simboloxía del fríu, son temátiques, como la de la naturaleza, qu'aparecen tamién nel restu la so obra». Cronolóxicamente abarquen dende 1927 a 1938, once años, ente ellos los finales de la so vida: «Son estos caberos, del 36 al 38 onde tien más actividá. Nellos, como se reflexa nel últimu, ta ya viendo la muerte cerca. Sicasí una de les temátiques qu'aparez con más frecuencia ye la esperanza: en Dios, na salú o en dalgún fai alusión a qu'acabe la guerra y acabe bien pa él» . En total son 73 poemes d'un conxuntu que'l propiu Galo consideraba unitariu: «De fechu nún de los testos da una especie d'instruciones de cómo se teníen d'imprimir. Tenía na cabeza confeccionalu como un llibru», desvela la investigadora.

Tanto ella como l'editor del otru volume resalten la singularidá y coherencia de la obra de Fernán Coronas nel contestu de la lliteratura del so tiempu, xunta la voluntá normalizadora pa col idioma y el so pruyimientu estéticu al cultivalu.