02/01/2026 a las 17:03h.

Los Berrones, la veterana banda de rock liderada por Ramón Blanco y Olegario Méndez despidíen l'añu vieyu y saluden el nuevu con discu embaxo'l brazu: 'Ta too podre' (Ataque!), un trabayu nel que ta la esencia más fondera del grupu y tola esperiencia fecha propia a lo llargo de les cásique ya cuatro déquedes de trayectoria de los llavianeses. Diez temes redondos y contundentes nos que los músicos de Tolivia espresen ensin filtros, como ye vezu nellos, la so visión d'una realidá que resume perbién el mesmu títulu del álbum.

Alrodiu del discu y cómo foi concebíu, Méndez desplica a ALITAR que «siguimos faciendo les canciones ente Ramón y yo, como ye la costume desque dexó'l grupu Tante en 2005 y en realidá como nos inicios alló a finales los 80. L'últimu toque siempre lu da Ramón, que ye'l más repunante. La diferencia agora ye que facémoslo ensin priesa, como nos va peteciendo. Y asina, amás, da vagar pa que posen un poco los cantares hasta que maurecen y nos convenzan del too. Ye como les mazanes, tienes que dexales maurecer un poco pa que sepan bien, tener esi posu. Queremos más sacar menos trabayos y que teamos a gustu con ellos».

En cuantes al espíritu qu'encierra l'album nuevu, el baxista del grupu reconozlu como «el más berrón de los últimos, nel sentíu que damos en toles tecles que nos marcaron de siempre, dende un principiu que yera'l de contar les hestories que tan alredor, el sentir del entornu anque tenga, obviamente, reflexones nuestres, pero que les ve cualquiera», afirma y pon por casu el tema 'El rastru del llimaz', nel que custionen la perda d'inmitidá nun mundu cada vez más vixiláu. «Ye que tamos cada vez más controlaos per tolos llaos. Que si radares. que si cámares, que si dame'l DNIpor cualquier paquete que te llega. ¿Qué ye esto? Nun hai nada que fagas que nun lo sepa nun sé quien y que puede vender esi datu. Qué Orwell ni que osties, ¡esto ta muncho peor!. Ye un exemplu de les coses que nos escmolecen y tamién, fígurome, a tola xente». O lo que describen en 'Nun trai cuenta', alrodiu la inxusticia ente un trabayu duru y los que viven bien ensin mover un deu. «Esa frase sentímosla a toles hores. Hai xente que vive estupendamente ensin facer nengún esfuerzu y a lo meyor los enquivocaos somos nós. ¿Cómo va traer cuenta trabayar?».

Méndez apunta que nun mundu como l'actual, a Los Berrones nun-yos falta motivu d'inspiración «pa meter la puya» y asina lo reflexa la canción que da nome al discu. «Nun ye la más descriptiva pero da cuenta de la cigua que paez que nos domina. Si nos dan a escoyer, paez que siempre lo facemos cola peor opción. Nunes ellecciones: a Trump o aAyuso, si podemos dir p'aquí o pa ellí, vamos siempre pal llau peor. ¿Pero qué ye, qué mos pasa? Ye la mesma sensación de cuando tienes una pesadiella: ¿Esto que ye, tamos cayendo al vacío picu abaxo? Y ye que mires onde mires paez que ta too podre. Nun hai manera». Énte ello, el músicu caltién que «a nós la única opción que nos queda ye reínos un poco de too», Polo que toca a lo que-yos apurre l'oficiu y la esperiencia, Olegario recurre a una frase del so compañeruRamón: «Diz él qu'a esta edá conoces más nomes de médicos que de chigreros. Y ye eso, nun hai meyor descripción del pasu del tiempu»,

Musicalmente afirma que «les nuestres influyencies siguen siendo'l rock clásicu de tola vida, dende los Beatles a Pink Floyd, ye lo que nos gusta y lo que sabemos facer, nes canciones sálennos estructures de pop rock». Nesos ritmos siguen retratando Los Berrones la vida que pasa, col meyor sentíu y humor.