06/03/2026 a las 13:00h.

Formada a finales de 2019 alrodiu del músicu y compositor Héctor M.Aneiros, la banda avilesina Guieldu diba consolidase dos años después colos sos actuales siete integrantes: amás del mentáu, Susana Sors, Carmen Tomé, Jorge Álvarez, Laura Méndez, Pablo Santamarta y Rubén Cadenas. 'Memories de Deva',ye'l so primer álbum,14 temes grabaos nos estudios 15.40 de Gozón con Senén Fernández. El so frontman, Aneiros fálanos d'esti trabayu.

–Consideráis esti discu una puente ente'l pasáu y el presente de la música celta. ¿En qué sentíu?

–Somos un grupu que nos inspiramos na música celta de los 80 y 90, los años d'esi boom onde se facía música de tremendísima calidá. Entós pa la xente que nos conoz agora, que pueda tener, qué sió, 17, 18 años, somos una cosa totalmente nueva, enxamás sintieron música celta d'esta manera, y la xente que ye mayor, reconoz esi bagaxe y esa inspiración nos grupos de los 80 y los 90.

–¿Cómo trabayáis el repertoriu? ¿Ye un llabor colectivu?

–La mayoría de los temes del discu son tradicionales asturianos y a nos préstanos nun los alteriar muncho,, aunque tenga dalgunos arreglos contemporáneos, que la xente siga reconociendo esa melodía tradicional. Normalmente compongo yo, tamién Susana, dellos otros y en Guieldu hai una montonera d'influyencies: yo vengo de la música celta, el baxista del métal, la cantante del folk americanu, la teclista de la clásica. Toes eses buelgues nótense a la hora de tocar, porque caún imprégnase de lo que lleva escuchando tola vida. Y como banda la nuestra filosofía ye interceltista, resaltar na música esaconvivencia de cultures que se formen a lo llargo l'Atlánticu.

–¿Cómo entendéis esi interceltismu dende Asturies?

–Hai munches formes de velo y a lo llargo la historia hebo quien lo vio dende un puntu de vista racial, que dio llugar a movimientos mui peligrosos. Pa nós l'interceltismu ye dalgo en continu movimientu, más que podamos venir de los celtes, como esa convivencia de cultures de la que falaba, como podemos referinos a lo mediterráneo, falar de Turquía,Grecia, Andalucía, países qu'entronquen una mesma zona cultural.

–¿Y amás d'esa filosofía,qué mas vos xune en Guieldu?

–Les ganes d'esplorar, yo creo. Ye un procesu perinteresante, un cantar que sientes nun programa d'Ambás y dices: val, ¿,cómo puedo llevar esi tema a otru terrén? Nun ye como dalgo que compones de cero. Esto tien una historia, un llabor d'investigación bien interesante. Y engancha más qu'una serie de Netflix. Sí,sí, de verdá (rises).

–¿Cómo foi el procesu de grabación del discu?

–Tardamos en grabalu tres años, porque agora tienes que dir sacando singles pa caltener a la xente un poco enganchada y eso foi lo que duró el procesu. Eso tamién te da munchu xuegu a la hora de crear y perfeccionar los temes, porque lleven munches capes musicales. Y tar nel estudiu de Senén permitiónos echar tol tiempu que quiximos pa crear.

–Al empar nun parásteis de tocar. ¿Qué vos aportó el directu pa dar forma a les canciones?

–Fueron evolucionando a midida que tuvimos a disposición nueves tecnoloxíes.Gracies a los conciertos pudimos facenos con una mesa de soníu dende la que llanzar programaciones o sistemes d'escucha interno, podemos tocar con metrónomos, establecer qué ritmu ye. No musical vercuálos son los temes que meyor funcionen y qué podemos facer nesti momentu o n'otru. Y la respuesta de la xente ye estupenda, en tolos sitios al final, acaba tol mundu saltando de toles maneres posibles. Llámanos l'atención.–

–Nun falamos de les collaboraciones...

–Tenemos a Jesús del Castillo, a Pepín de Muñalén tocando'l saxofón, con un solo con aire non precisamente tradicional,sinón más bien de pop de los 80 y a 6 Riales, qu'aporten esa voz y esa raíz más pura de la música asturiana, que son les pandereteres.