24/04/2026 a las 09:26h.

E mbaxo'l títulu 'El motor de la historia' (Trabe), axunta l'historiador Rafael Rodríguez Valdés (Uviéu, 1978) una curiosa escoyeta de trabayos d'investigación y divulgación hasta agora dispersos n'estremaes publicaciones y centraos nun ampliu abanicu temporal del contextu contemporáneu asturianu. En total son una treintena d'artículos de diversa estensión asoleyaos a lo llargo de dos décades, dende 2004 al 2024. El resultáu una obra de llectura imprescindible pa conocer el nuestru pasáu más allegáu dende una visión científicamene impecable y al empar comprometida con una visión crítica de la realidá histórica del país.

Dende la llibrería Trabe, onde trabaya y dirixe la colección de traducciones de la lliteratura universal Calume, l'investigador revela que «nun axunto equí tolos que tengo publicaos. Fice una selección basándome un poco en cuestiones tamién personales, dende los primeros de cuando yera namás un estudiante, hasta los más recientes, ya dedicándome a otras cuestiones, pero calteniendo'l venceyu más que cola investigación, cola divulgación». En cuantes al so calter y a los temes abordaos, Rodríguez Valdés desplica que «hai dalgunos testos que son más académicos y tienen munches notes al pie, aparatu crítico y bibliográficu, y otros que más ensayísticos, pol formatu más periodísticu o lliterariu. Son toos d'historia contemporánea d'Asturies, dende la francesada, que tengo un artículu que titulo 'La banda sonora de la francesada', sobre canciones y sones d'esi tiempu, hasta Conceyu Bable. Hai otros que tienen que ver más col movimientu obreru, el republicanismu, les clases populares asturianes, la clase obrera, que son un poco el centro más de la investigación, aunque después siempre hai cosas collaterales que tienen que ver con esto, d'una d' otra manera».

Amás del interés independiente que despierte caún de los trabayos agora reuníos, l'historiador apunta a les sos propies aportaciones n'asuntos como l'estudiu de los discursos llingüísicos en relación al mundu obreru, del que foi pioneru y al so enfotu en que «a lo meyor diba a ser conveniente, y espero qu'esti llibru ayude, a que caminos que yo derrompí pudieran continuase, afondase nellos, y meyorar, porque creo que también ta bien que venga xente tres d'ún, non solo pa enmendar, que ye necesario, porque asina ye como avanza el procedimientu científicu, sinón tamién pa completar visiones que yo podía tener nun momentu da, y fáce-yos nueves preguntes a cuestiones que yo ponía arriba la mesa, qu'eso tamién es necesario en cualquier investigación». Y pon d'igualmiente como exemplu que «hai xente qu'usó la prensa como fonte d'estudiu, o distintes artes como la pintura, la fotografía o la música, non como centru de la investigación, en dalgunos casos sí, pero n'otros simplemente como añadios. y yo una de las cosas que creo aporta esti volume ye que me valí de toes eses fontes y espresiones artístiques como elementos para construir y conocer la historia contemporánea d'Asturies. Y parecióme interesante que tuvieren equí porque dellos d'esos trabayos diéronse en medios mui estremaos, dende formatos dixitales o centraos nun públicu xeneral a publicaciones de sectores mui concretos ya ideoloxizaos. Esa combinación tien que ver tamién con una manera d'entender la historia y de cómo dala a conocer.. Yo forméme na universidá, fice investigaciones académicas, pero siempre dende'l primer momentu quixe como investigador, sacalo fuera de les paredes universitaries. Eso tamién desplica la publicación d'esti llibru», aclaria'l so autor.

Ente los asuntos que Rodríguez Valdés cuenta que pueden llamar más l'atención de los llectores non esclusivamente especializaos cita «el del exiliu, que centro en Matías Conde, republicanu asturianu, exiliáu primero en Francia y después en México, qu'afinales de los 40 publica ellí 'Sol en los pomares'. Eso puede interesar lo mesmo al que quiera saber de la dictadura, del exiliu asturianu o de la nuestra lliteratura. Ehí ye onde l'historiador pon el puñu enriba la mesa ente quien fai namás un recuentu y diz: 'Nos 40 Conde publica 'Sol en los pomares' y Constantino Cabal 'L'alborá de los malvises'. Y nun ye lo mesmo, claro, porque Cabal ye cronista oficial d'Asturies nesi tiempu y eso nun ye un datu menor, y Conde un republicanu esiliáu». Ye namás un casu de los que planteguen los trabayos axuntaos nun llibru enllenu d'aportaciones igual d'atractives que dafechu impagables.