17/04/2026 a las 11:54h.

La periodista Beatriz R. Viado (El Remediu, Nava, 1976) reún nel volume 'Na superficie' (Trabe), una escoyeta d'artículos d'opinión publicaos nel so blog Alien Acción y en dellos otros medios dende 2011 hasta 2024. La so autora trabayó nel semanariu 'Les Noticies', del que foi directora hasta la desaparición del mesmu y anguaño exerce la docencia nel institutu d'A Veiga como profesora de Filosofía. Dende ellí fálanos d'esti llibru y del oficiu informativu na nuestra llingua.

–¿Qué la decidió a xuntar toos estos artículos?

–Sinceramente, foi una propuesta de Trabe y parecióme bien.De mano tenía mieu de que nun tuviera sentíu xuntalos porque son artículos independientes, pero después vi que yeren los artículos d'una moza, agora una señora, que vivía nel mundu corriente colos sos problemes, sí me comentó della xente que tienen dalgún aspeutu xeneracional, sobre'l mundu llaboral, el feminismu, etc. Y el conxuntu sí parez que tien más sentíu del que pensaba nun principiu.

–¿Podía dicise, entós, que funciona como una crónica del tiempu nel que s'escribieron?

–Ye una realidá que se parez muncho a la de güei, pero tamién mui diferente, non tanto en cuantes a los fechos como a los discursos del capitalismu, la precariedá llaboral o la crítica política. Too eso sigue igual o peor, pero socialmente cambió la forma d'analizar esos fenómenos, como si se normalizare. Esi mundu que yo veía fatal, agora ta normalizáu. Nesi sen si volviere a escribir estos artículos, lo que diba cambiar yera'l discursu.

–¿L'espoxigue del antifeminismu sería un de los casos más esmolecedores d'esa cierta normalización reaccionaria?

–Esacto. La mio xeneración ya viviera diferente a la de mio madre o mio güela, gracies al feminismu. Pero cuando llegamos ehí foi cómo que nos dixeran: '¿Ui, pero á ónde vais?'. Y la reacción agora ye mui brusca y evidente, nin siquier dio tiempu a asentar delles coses. Y como los discursos d'agora tamién son sólidos, dientro los sos múltiples filos, la sensación que tenemos ye comode que nun se puede respirar. Xubimos cola igualdá y volvimos a baxar. Falta tovía muncho y la realidá d'esos discursos ye la preba de lo muncho que falta por llograr.

–¿En que crees que tien contribuyío a esa situación la simplificación de los mensaxes nes redes sociales ?

–Claro yo creo que'l cambiu ta tamién nel diálogu políticu o social que caltenemos agora. Ya McLuhan dicía aquello de que'l mediu ye'l mensaxe y el mediu breve y poco posáu de les redes determina cómo y hasta ónde falamos, ensin profundizar. Hai un discursu más o menos coherente de reacción pero enllenu d'anécdotes y resulta mui difícil dacuando dir al asuntu principa. Tol mundu tien un datu qu'hai que rebatir y piérdese un poco esa lreflexión que sí que nos puede ayudar a llegar a un puntu d'alcuentru.

–¿Yes pesimista de qu'eso pueda cambiar?

–Soilo, pero nun quería selo. Algamar esi puntu d'alcuentru parezme dificil porque ye un diálogu mui fragmentáu y da la impresión de qu'hai quien nun va ller más allá d'un titular. Por eso, ente otres razones, ya me desvinculé bastante del mundu periodísticu. Procuro tar al día, pero cuesta poder controlar tolos relatos enllenos de coses que te distraen más qu'illustrate.

–Nel casu del periodismu n'asturianu ¿sería vidable güei un mediu xeneralista como 'Les Noticies', solo en llingua asturiana, en formatu dixital, pongo por casu?

–Foi un deprendizaxe duru y un proyectu colos sos claroscuros, pero tuvo coses mui guapes que nel so momentu igual nun supimos valorar, Y en cuantes a la normalización del asturianu, cuento que valió tamién poder tratar los temes más diversos. Dalgo asina podía tar guapo, pero yo nun sé hasta que puntu la xente tien ganes de tirar por ello. La verdá ye que taría bien y diba ser una bona ferramienta pa la normalización, como foi 'Les Noticies'.