14/10/2026 Actualizado a las 21:49h.

San Martin auzoaren sorreraren 100. urteurrena ospatzeko, samartindarren arteko bazkaria antolatu dute auzoko bizilagunek. Azaroaren 7an egingo dute hitzordua, San Martin egunaren inguruan, Joseba jatetxean. Ekimenaren helburua auzoarekin lotura duten herritarrak elkartzea eta urte hauetan guztietan bizitako esperientziak elkarrekin partekatzea da.

Auzoaren sorreraren mendeurrenak garrantzi berezia du San Martingo bizilagunentzat. Antolatzaileen arabera, duela ehun urte, orduko Azkoitiko alkateak auzoaren sorrera bultzatu zuen, langileentzat etxebizitzen beharra zegoela ikusita. Ordutik hona, nortasun berezia garatu dute auzotarrek, eta harro agertu dira samartindarrak izateaz.

Bazkaria auzoarekin lotura duten pertsona guztiei zuzenduta dago: San Martinen bizi diren herritarrei, bertan jaio eta gaur egun beste nonbait bizi direnei, baita auzoan jaio ez arren gerora bertako egin direnei ere. Antolatzaileek nabarmendu dutenez, samartindar sentitzen den edonor dago gonbidatuta.

Bazkarirako menuak 40 euro balioko ditu, eta izen-ematea eta ordainketa aurrez egin beharko dira. Horretarako, urriaren 13tik 23ra bitartean izango da aukera, Bitturiñe dendan edo Ardatz elkartean (Bañuetxien), arratsaldez.

Antolatzaileek auzoko eta auzoarekin lotura duten herritar guztiak parte hartzera animatu dituzte, San Martingo bizipenak giro onean gogoratu eta partekatzeko.