Саха сиринээҕи айылҕа харыстабылын борокуратуурата Экология, айылҕаны туһаныы уонна ойуур хаһаайыстыбатын министиэристибэтин, ону тэҥэ «Росрыболовство» Илин Сибиирдээҕи  управлениетын исписэлиистэрин кытыннаран, Өймөкөөн улууһугар «Саха Голд» ХЭУо кыһыл көмүһү геологическай үөрэтиигэ, чинчийиигэ уонна хостооһуҥҥа лиссиэнсийэлээх учаастагар тахсан, бэрэбиэркэни ыытта.

Бэрэбиэркэ түмүгүнэн быһаарыллыбытынан, Дириҥ Үрэх хочотугар хайа үлэлэрин ыытыы кэмигэр бу тэрилтэ айылҕаҕа, экологияҕа буортуну оҥорбут.

Ол курдук, Дириҥ Үрэхтэн ылыллыбыт  ууну чинчийии түмүгэр, харахха көстөр киртийии, нуорманы тутуспат буолуу уонна уу хаачыстыбата биллэ мөлтөөһүнэ бэлиэтэммит. Ону таһынан, маннык куһаҕан дьайыыны оҥоруу түмүгэр, уу биологическай ресурсаларыгар, балыктар, үөн-көйүүр, кыыллар олохсуйар эйгэлэригэр хоромньу оҥоһуллубут,  айылҕа харыстабылын сокуонугар атын да кэһиилэр тахсыбыттар.

Тулалыыр эйгэҕэ оҥоһуллубут хоромньу уопсай суумата 24,6 мөлүйүөн солкуобайга тэҥнэспит.

Бу кэһиилэринэн айылҕа харыстабылын борокуратуурата сир баайын туһанааччыга ирдэбил (представление) киллэрдэ, РФ Административнай быраабы кэһиилэрин кодексын (КоАП РФ) 10 састаабынан, ол иһигэр:

7.1 ыст. (сир учаастагын сокуоннайа суох былдьааһын);

7.3 ыст. 2 ч. (лиссиэнсийэҕэ көрүллүбүт усулуобуйаны кэһии);

7.6 ыст. (уу эбийиэгин сокуоннайа суох былдьааһын эбэтэр, туруоруллубут усулуобуйаны кэһэн туһаныы);

8.2 ыст. 4 ч. (тобоҕу харайыыга тулалыыр эйгэни харыстааһын ирдэбилин тутуспат буолуу);

8.5 ыст. 1 ч. (экологическай иһитиннэриини кистээһин, эбэтэр, токурутуу);

8.13 ыст. 4 ч. (уу эбийиэктэрин харыстыыр быраабылалары кэһии);

8.14 ыст. 2 ч. (ууну туһаныы быраабылатын кэһии);

8.21 ыст. 2 ч. (атмосфераҕа салгыны харыстыыр быраабылалары кэһии);

8.46 ыст. (тулалыыр эйгэҕэ куһаҕан дьайыыны оҥорор эбийиэктэри судаарыстыбаннай учуокка туруорарга сайабылыанньа биэрии, эбэтэр, учуот сибидиэнньэлэрин саҥардыы ирдэбилин толорбот буолуу, болдьоҕун аһарыы);

8.48 ыст. 1 ч. (уу биологическай ресурсаларын уонна кинилэр олохсуйар эйгэлэрин харыстыыр ирдэбиллэри тутуспат буолуу) административнай буруйу оҥоруу дьыалалара көбүтүлүннүлэр.

Борокуруор дьайыыларын аакталарын көрүү түмүктэрэ СӨ Борокуратууратын хонтуруолугар бааллар.