Ukrayina Mudafaa nazirliginiñ Baş istihbarat idaresi, Armannıñ 7-nde Yaltağa yaqınlaşqan "Magura" deñiz dronlarınıñ videosını derc etti, bundan sebep Rusiye akimiyeti şeer yalısı ve plâjlarından tahliye aqqında ilân etti.

"2026 senesi Armannıñ 7-nde, Rusiye işğali altında bulunğan Yalta şeeriniñ Künü arfesinde, Ukrayina Mudafaa nazirliginiñ "Group 13" mahsus bölüginiñ operatorları Magura arbiy deñiz platformalarınıñ paradını keçirdiler. Böylece, GUR mahsus hızmetçileri, serbest Yaltada peyda olğan ve pekitilgen eski bayram ananesini ğayrıdan tiklediler — şeer yalısı yanında Ukrayin arbiy gemileriniñ hayırlav çıqışı", — dep aytıla video altında yazılğan haberde.

Ücümniñ neticeleri aqqında Ukrayina Mudafaa nazirliginiñ Baş idaresinde haber etilmedi, ücümniñ aqibetleri videolarda qayd etilmedi.

2022 senesi arman ayından başlap Qırım ve Aqyarda aman-aman er kün patlav sesleri eşitile. Rusiye akimiyeti "Ukrayina uçucısızlarına" qarşı atış, "ava mudafaasınıñ işi" ve Rusiye arbiyleriniñ "talimleri" dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.