Avgustnıñ 12-ne keçer gecesi Rusiye arbiyleri Ukrayinağa Rusiye regionları, vaqtınca işğal etilgen Donetsk ve Rusiye işğal etken Qırımnıñ Sarabuz qasabasından "İskander-M" ballistik raketası, X-31P radiolokatsion ile küreyeş raketası, X-35 aviatsiya raketası ve 138 dronnen ücüm etti, dep haber ete Ukrayina Silâlı quvetleriniñ Ava küçleri.

"Darbeniñ esas yönelişi – Sumı, Odesa vilâyetleri. İlk malümatqa köre, saat 09:00-ğa qadar ava mudafaası memleketniñ şimali, cenübi ve şarqında Shahed, gerber ve diger dronlar olğan 112 duşman uçucısızını urdı ya da bastırdı. 16 yerde duşmannıñ ava ücümi qayd etildi, eki yerde parçalar tüşti", – dep haber ete Ukrayina arbiyleri.

Ayrıca qayd etilgenine köre, ücüm devam ete, "ava boşluğında bir qaç duşman uçucısızı bar, şunıñ içün telükesizlik qaidelerine riayet etmek kerek".

Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.

Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.

İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.

Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.