Ukrayina Arbiy-deñiz quvetleriniñ ava quvetleri, Armannıñ 7-ne keçer gecesi Rusiye ordusı Ukrayinağa çeşit tipli 147 dronnen ücüm etti, dep bildirdi. Üç yönelişten RF, işğal etilgen Donetsk ve ilhaq etilgen Qırımnıñ Sarabuz qasabasından dronlar uçurıldı.

İlk malümatqa köre, saat 08:30 ava mudafaası memleketniñ şimalinde, cenübinde ve şarqında 114 Shahed, Gerbera, Italmas ve diger dronlarnı yoq etti.

Ukrayina arbiyleri 15 yerde 29 ücüm dron urulğanını ve 4 yerde parçalar tüşkenini qayd etti.

Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.

Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.

İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.

Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.