Коррупцияга қарши курашиш агентлиги директорининг буйруғи билан (24.07.2026 й. АВ рўйхат рақами 3906-сон) Коррупцияга қарши миллий сертификатлаштириш тартиби тасдиқланди.

Ҳужжат 30.12.2025 йилдаги ПФ-270-сон Фармонга мувофиқ ишлаб чиқилган ва давлат органлари ва ташкилотларида, шунингдек устав фондида (устав капиталида) давлат улуши 50% ва ундан ортиқ бўлган хўжалик жамиятларида Коррупцияга қарши миллий сертификатлашни ўтказиш тартибини белгилайди.

Давлат органлари ва ташкилотларининг фаолияти Коррупцияга қарши сертификатлаштириш миллий менежмент тизими доирасида баҳоланади, унинг натижаларига кўра улар сертификатлаштирилади.

Коррупцияга қарши курашиш агентлиги давлат органлари ва ташкилотларида Коррупцияга қарши сертификатлаштириш миллий менежмент  тизимини жорий этиш учун масъул ваколатли орган ҳисобланади.

Ушбу тизимни жорий этиш Агентлик томонидан тасдиқланадиган жадвалга мувофиқ босқичма-босқич амалга оширилади.

Сертификатлаштириш биринчи навбатда коррупцияга қарши курашиш самарадорлигини рейтинг баҳолаш натижаларига кўра фаолияти "қониқарсиз" деб топилган, коррупцияга оид жиноятлар сони кўпайган ва уларга нисбатан фуқароларнинг мурожаат ва шикоятлари кўп бўлган давлат органлари ва ташкилотларида жорий этилади.

Сертификатлаштириш босқичма-босқич амалга оширилади:

• жадвални ишлаб чиқиш ва тасдиқлаш;

• ишчи гуруҳни шакллантириш ва унинг таркибини тасдиқлаш;

• сертификатлаштириш ҳажми ва мақсадларини ҳисобга олган ҳолда баҳолаш дастурини тасдиқлаш;

• баҳолашни масофадан ва (ёки) жойига чиққан ҳолда ўтказиш;

• ишчи гуруҳ хулосасини тайёрлаш ва сертификатлаштириш тўғрисида қарор қабул қилиш.

Давлат органи ёки ташкилотининг функционал хусусиятларини ҳисобга олган ҳолда баҳолаш масофадан ва (ёки) жойига чиққан ҳолда амалга оширилади ҳамда 14 иш кунидан ошмаслиги керак. 

Баҳолаш дастури қуйидаги йўналишлар бўйича ишлаб чиқилади:

• очиқлик ва шаффофликни таъминлаш;

• жамоатчилик кенгашлари фаолияти орқали жамоатчилик назоратини таъминлаш;

• коррупция хавфини бошқариш тизимининг самарадорлиги;

• ходимлар томонидан хизмат фаолияти талабларига, шунингдек хизмат ва хизматдан ташқари одоб-ахлоқ меъёрларига риоя этилишини таъминлаш;

• манфаатлар тўқнашувининг олдини олиш механизмларини жорий этиш;

• коррупцияга қарши курашишнинг ички механизмларини жорий этиш;

• коррупцияга қарши ички назорат бўлинмалари фаолиятининг самарадорлиги.

Баҳолаш 100 баллик тизим бўйича ўтказилади, бунда:

• 81 баллдан 100 баллгача  – "яхши";

• 55 дан 80 баллгача  –  "қониқарли";

• 55 баллдан кам  – "қониқарсиз."

Фаолияти "яхши" деб баҳоланган давлат органлари ва ташкилотларига Коррупцияга қарши сертификатлаштириш миллий менежмент  тизими талабларига мувофиқлигини тасдиқловчи сертификат берилади. Сертификатнинг амал қилиш муддати уч йил.

Агар фаолият "қониқарли" деб баҳоланса, аниқланган камчиликларни бартараф этиш учун бир ойдан ортиқ бўлмаган муддат берилади. Улар белгиланган муддатда бартараф этилгандан сўнг бундай ташкилотларга сертификат берилади.

"Қониқарсиз" баҳоланганда, шунингдек, аниқланган камчиликлар қўшимча муддатда бартараф этилмаган тақдирда, ташкилот сертификатлаштиришдан ўтмаган ҳисобланади. Тизим тўлиқ жорий этилгунга қадар бундай ташкилотлар раҳбарларига рағбатлантирувчи устамалар тўлашни тўхтатиб туриш учун асос бўлади.

Ҳужжат Қонун ҳужжатлари маълумотлари миллий базасида эълон қилинган ва 25.07.2026 йилдан кучга кирди.

                                                Лола Абдуазимова