Unai Laso eta Martxel Iztueta dira udako pilotariak. San Fermin Pilota Torneoko finalean Peio Etxeberria eta Jose Javier Zabaleta garaitu, eta Donostia Hiria Torneoko finalean Joseba Ezkurdia eta Jose Javier Zabaleta mendean hartu eta gero, abuztuaren 28an Aitor Elordi eta Jose Javier Zabaleta izan zituzten aurkari Bilbon, Aste Nagusia Torneoko final handian. 

San Ferminetan eta Donostian garaile izan eta gero, Laso eta Iztueta ziren faborito, eta bikoteak aurreikuspenak bete zituen, urdinak hasieratik markagailuan aurreratu zirelako. Elordiren txapa, Zabaletaren akatsa eta Lasoren jokaldi pare bati esker 0-4 aurreratu ziren, baina Elordik txokoan egindako tantoari esker 1-4 hurbildu ziren gorriak. Bizkaia pilotalekua Elordiren alde zegoen, baina hori ez zen nahikoa izan Laso eta Iztueta gelditzeko. Lehia gogortu zen; 1-7 aurreratu ziren urdinak Laso pletoriko bati esker, baina gorriek ez zuten etsi eta 5-8 eta 9-11 hurbildu ziren, partida ikusgarrian. Hortik aurrera Lasok partida kontrolatu zuen eta urdinak tantoak pilatzen jarraitu zuten. Azkenean, 11-21, Bilboko Torneoko txapela lortu zuten, udako jaialdietako hirugarrena. 

Zabaletarendako kolpe gogorra izan zen, San Fermin, Donostia eta Bilboko Aste Nagusiko hiru finalak galdu dituelako. Etxarrengo atzelariak Gasteizko Andra Mari Zuriko torneoa irabazi zuen Javier Zabaletarekin batera, Iker Larrazabalen eta Jon Mariezkurrenaren kontrako final paretsu eta estuan Mariezkurrena lesionatu eta gero.