Имрӯз, 13-уми октябр Эмомалӣ Раҳмон, раисҷумҳури Тоҷикистон зимни сафари корӣ ба ноҳияи Шаҳринав чанд бинои маркази таълимии КҲФ-ро ифтитоҳ ва дар намоиши тамрини махсуси “Скала-2026” ширкат кард. Ҳамчунин, дар доираи ин сафар, раисҷумҳур чанд иншооти дигари иҷтимоиву иқтисодиро дар ин ноҳия фосилавӣ ба истифода дод.

Хадамоти матбуоти раисҷумҳури кишвар навишт, Эмомалӣ Раҳмон бо ҳадафи ифтитоҳи зерсохтҳои соҳаҳои гуногун ва шиносоӣ бо вазъи зиндагии сокинон, ба ин ноҳия рафтааст.

Раисҷумҳур нахуст аз Маркази ҷумҳуриявии таълимию методии Кумитаи ҳолатҳои фавқулода (КҲФ)-ро боздид карда, дар ин марказ бинои “Кохи наҷот”-ро ба истифода додааст.

Пас аз ин, Эмомалӣ Раҳмон 16 иншооти Маркази ҷумҳуриявии таълимию методии КҲФ-ро тариқи фосилавӣ мавриди баҳрабардорӣ қарор додааст.

“Аз ҷумла бинои маркази таълимию кинологӣ, маркази идоракунии машқгоҳ, машқгоҳи таълимию амалӣ барои омодасозии наҷотдиҳандагон, паноҳгоҳи мудофиаи гражданӣ, шаҳраки муваққатӣ барои ҷойгиркунии аҳолии аз офатҳои табиӣ ва дигар ҳолатҳои фавқулода зарардида, хобгоҳ, бунгоҳи тиббӣ ва ошхона, хобгоҳ барои дастурдиҳандагон ва наҷотдиҳандагони миллӣ ва хориҷӣ, гармхонаҳои хоҷагии ёрирасон, варзишгоҳ ва ҳаммом”, – навишт манбаъ.

Хадамоти матбуоти раисҷумҳур гуфт, ки яке аз зерсохти ин марказ машқгоҳи таълимию амалӣ барои омодасозии наҷотдиҳандагон мебошад. Он дар беш аз 10 ҳектар бунёд шуда, дорои 20 марҳилаи омӯзишӣ ва омодагии наҷотдиҳандагон ҳангоми офатҳои табиӣ мебошад.

Дар маркази мазкур, паноҳгоҳи мудофиаи шаҳрвандӣ низ фосилавӣ ифтитоҳ шуд. Ба навиштаи хадамоти матбуотӣ, паноҳгоҳ ҳамчун иншооти таъиноти махсус барои ҳимояи аҳолӣ дар ҳолатҳои зарурӣ пешбинӣ шуда, “мавҷудияти чунин иншоот баҳри таъмини амнияти шаҳрвандон ва омодагӣ ба ҳолатҳои эҳтимолии фавқулода аҳамияти зиёд дорад”.

Шаҳраки муваққатӣ барои ҷойгиркунии аҳолии аз офатҳои табиӣ ва дигар ҳолатҳои фавқулода зарардида, аз иншооти дигари ин марказ мебошад. Ин шаҳрак дар 1 ҳектар бунёд шуда, дар ҳудуди он 68 хайма барои 800 нафар ҷойгир шудааст.

Дар марказ инчунин, бо ҷалби шарикону рушд бинои нави таълимӣ бунёд шудааст, ки гуфта мешавад аз ҳуҷра бо лавозимоти омӯзишӣ иборат аст.

“Марказ имкон фароҳам меорад, ки дар ин ҷо ҳайати роҳбарикунандаи вазорату идораҳо ва мақомоти иҷроияи ҳокимияти давлатии шаҳру ноҳияҳо барои пешгирии офатҳои табиӣ  ва дигар ҳолатҳои фавқулода аз омӯзиши амалӣ гузаранд”, – навишт хадамот.

Эмомалӣ Раҳмон дар ҳамин ҷо, дар намоиши тамрини махсуси “Скала-2026” бо ширкати воҳидҳои наҷотдиҳии мақомоти ваколатдори давлатҳои аъзои Созмони паймони амнияти дастҷамъӣ (СПАД) дар самти пешгирӣ ва рафъи оқибатҳои ҳолатҳои фавқулода дар мавзуи “Бартараф намудани оқибатҳои заминларзаи харобиовар дар Ҷумҳурии Тоҷикистон” ширкат кардааст.

Дар ин намоиш аъзои кишварҳои СПАД, аз ҷумла, Тоҷикистон, Қазоқистон, Қирғизистон, Белорус ва Русия иштирок кардаанд.

Пас аз ин раисҷумҳур, 6 зерсохти дигар, аз ҷумла, бинои нави мактаби рақами 58, қасри фарҳанг, бемористони “Табиб-2013”, корхонаи истеҳсоли профилҳои пластикии “Файзи Осиё”, майдони варзишӣ ва як толори варзиширо дар ноҳияи Шаҳринав фосилавӣ ба истифода додааст.