15/09/2026 a las 21:01h.

Sahatsa dantza taldeak 50. urteurrena ospatzeko jaialdia egingo du larunbat honetan, irailaren 19an, Azkoitiko plazan. Ekitaldia arratsaldeko 18:30ean hasiko da eta taldearen ibilbidean parte hartu duten eta gaur egun taldean ari diren dantzari eta musikariak izango dira protagonistak.

Guztira, 70 dantzari eta musikari inguruk hartuko dute parte Sahatsa 50 Jaialdian, belaunaldi ezberdinetako kideak elkartuz. Emanaldian Lapurdiko, Nafarroa Behereko, Gipuzkoako eta Nafarroako dantzak eskainiko dituzte, Sahatsaren 50 urteko ibilbidearen erakusgarri.

Urteurrenaren harira antolatutako ekitaldien barruan, Sahatsako kide eta taldeko kide ohiak hainbat kaletan aritu dira azken hilabeteotan. Ekaina eta uztailean, Urrestillako, Azkoitiko eta Azpeitiko kaleak zeharkatu zituzten Gipuzkoako ezpatadantzarekin, taldearen 50. urteurrena herritarrekin batera ospatzeko.

Oraingoan, ordea, kaleetako emanaldiak alde batera utzi eta plazara eramango dute dantza, jaialdi berezi baten bidez. Lehen hitzordua larunbat honetan izango da Azkoitian, eta astebete geroago, irailaren 26an, larunbata, Azpeitiko plazan egingo dute bigarren emanaldia.

Horrela, Sahatsak bere 50 urteko ibilbidea ospatzen jarraituko du, taldean ibilitako dantzari eta musikari ohiak eta egungo kideak belaunaldi ezberdinetako ikuskizun batean elkartuz.