2010eko animaziozko klasikoaren irudi errealeko egokitzapena Araban hasi ziren ekainean filmatzen, eta orain Nafarroan ari dira lanean, Urbasa-Andia parke naturalean. Bertan, hilabete amaierara arte itxita egongo dira hainbat errepide eta aparkaleku.

Disney hezur-haragizko pertsonaiekin errodatzen ari den Rapunzel (Michael Gracey) filmaren ekoizpenak Euskal Herrian jarraitzen du. 2010eko animaziozko klasikoaren irudi errealeko egokitzapena Araban hasi zen filmatzen ekainean, eta orain Nafarroako mendilerroan ari dira lanean, Urbasa-Andia parke naturaleko basoetan.

Azaldu dutenez, Nafarroako Gobernuak hainbat neurri hartu ditu filmaketak segurtasunez egin daitezen: abuztuaren amaierara arte itxita egongo dira Morterutxo (SL-NA 290) eta Zelaiaundi-Hayedo Encantado (SL-NA 291) bidezidorrak, baita Sorosgain, Morterutxo eta Bioitzako aparkalekuak ere. Pagadi hauen berezitasuna eta itxura “magikoa” izan dira Disneyk Nafarroako kokaleku hau hautatzeko arrazoi nagusiak.

Aurretik, Gaubeako haranean errodatu dute, eta besteak beste, 30 metrotik gorako dorre bat eraiki dute San Martin de Valparaisoko zelaietan. Ekoizleek La Campa ingurua aukeratu zuten bere harkaitz, baso eta errekastoengatik. Inguru hori eskalatzaileen artean oso ezaguna den arren, sarbideak mugatu egin behar izan dituzte asteotan.

Euskal Herriko kokalekuez gain, datozen hilabeteetan katedraleko eta alde zaharreko eszenak Gironan filmatuko dituzte, baita Alacanteko Ciudad de la Luz estudioetan ere. Aktore taldeari errepataruta, Teagan Croft aktoreak gorpuztu du Rapunzel, eta Milo Manheim da Flynn Rider. Aurreikuspenen arabera, live action bertsio berri hau 2028ko martxoaren 31n iritsiko da zinema-aretoetara.