«Мова ж не пра пачатак ужо там крымінальнай справы, судовага працэсу. Пакуль гаворка аб звароце ў пракуратуру, дзе можа разглядацца гэтае пытаньне. А гэта можа расьцягнуцца ў часе. І вось важны момант — гэта папярэджаньне Лукашэнку, каб ён ня ўцягваўся ў вайну супраць Украіны», — сказаў Свабодзе Ўладзімір Фясенка.

У той жа час, паводле яго, гэта не галоўнае папярэджаньне, бо раней прэзыдэнт Украіны Ўладзімір Зяленскі заяўляў, што Ўкраіне ў выпадку правакацыі ёсьць чым адказаць.

Уладзімір Фясенка дадаў, што перадача гэтага звароту ў пракуратуру менавіта цяпер можа быць зьвязана з больш жорсткай пазыцыяй Украіны датычна Лукашэнкі пасьля звальненьня папярэдняга кіраўніка Офісу прэзыдэнта Андрэя Ярмака, які выступаў за больш гнуткія дачыненьні з уладай Беларусі, з актывізацыяй Лукашэнкі ў ягонай падтрымцы расейскай вайны, а таксама са спробамі прадстаўнікоў адміністрацыі ЗША ўцягнуць Украіну ў супрацу зь Беларусьсю.

«Была інфармацыя, што нас хацелі таксама ўцягнуць у гэтую каапэрацыю з Лукашэнкам. І вось тут Ўкраіна можа дэманстраваць сваю прынцыповасьць — падаваць сыгналы амэрыканскім партнэрам, што ў нас ёсьць, скажам так, свае прэтэнзіі, прынцыповы, у тым ліку, прававыя прэтэнзіі да Аляксандра Лукашэнкі», — патлумачыў палітоляг.

«Але юрыдычна — гэта нагадваньне Лукашэнку, што стаўленьне да яго можа прынцыпова зьмяніцца і менавіта вось крымінальная справа супраць яго можа быць прыкметай кардынальнай зьмены стаўленьня да цяперашняга дыктатара ў Беларусі», — адзначыў ён.

У той жа час Уладзімір Фясенка мяркуе, што пэрспэктыва крымінальнай справы пакуль нявызначаная.

«Варта разумець, што можам гаварыць толькі пра завочнае правасудзьдзе, як гэта было датычна нашага колішняга прэзыдэнта Віктара Януковіча. Мы ня можам зараз сказаць дакладна, калі менавіта гэта будзе, але я мяркую, што хутчэй за ўсё — гэта непазьбежна. Рана ці позна будзе нейкі судовы працэс і па Пуціну, і па Лукашэнку. Па Лукашэнку — за яго садзейнічаньне нападу на Ўкраіну, падтрымку вайны Расеі супраць Украіны. Гэта пытаньне часу», — перакананы ўкраінскі палітоляг.

28 ліпеня стала вядома, што адміністрацыя прэзыдэнта Ўкраіны, як паведаміла агенцтва Reuters, зьвярнулася да Генэральнай пракуратуры з просьбай разгледзець магчымасьць завядзеньня справы супраць Аляксандра Лукашэнкі.

У той жа дзень Беларускі дэмакратычны форум (кіраўнік Валер Цапкала) у сваім Telegram-канале апублікаваў фота адпаведнага звароту, падпісанага намесьнікам кіраўніка Офісу прэзыдэнта Ўкраіны Алегам Татаравым. Аднак у гэтым дакумэнце не згадвалася імя Лукашэнкі.

У арганізацыі патлумачылі, што імя Лукашэнкі і просьба даць прававую ацэнку ягоным дзеяньням у падтрымцы расейскай агрэсіі зьмяшчалася ў тэксьце іхнага звароту ў адміністрацыю ўкраінскага прэзыдэнта.

Пакуль гэтую інфармацыю не камэнтавалі ні ў Офісе прэзыдэнта Ўкраіны, ні ў Офісе генэральнага пракурора. Лукашэнка таксама пакуль не адрэагаваў на гэта паведамленьне.

Украінская служба Радыё Свабода зьвярнулася па адпаведныя камэнтары да дзяржаўных і праваахоўных структур Украіны.

У лютым 2025 году ўкраінская грамадзкая арганізацыя «ДрукАрмія» спрабавала праз суд дабіцца завядзеньня крымінальнай справы супраць Аляксандра Лукашэнкі і прыцягненьня яго субсыдыярнай адказнасьці за падтрымку агрэсіі Расеі разам з Уладзімірам Пуціным, уладамі Ірану і Паўночнай Карэі.

Ініцыятар вызначыў у сваім пазове памер агульнай кампэнсацыі Ўкраіне — 1,9 дэцыльярда грыўняў (лічба ў 37 знакаў). Але тады суд пакінуў гэты пазоў бяз руху.