Муфаттишон дар ноҳияи Нуробод ба таҳқиқи қазияи латукӯби як омӯзгор оғоз кардаанд, ки видеои муроҷиати ӯ дар Радиои Озодӣ хашми корбарони шабакаҳои иҷтимоиро барангехт.

Як манбаъ дар Шуъбаи корҳои дохилии ноҳия рӯзи 22-юми май ба Радиои Озодӣ гуфт, фарди гумонбар ба латукӯбро “ба идораи милиса овардаанд ва бозпурсӣ идома дорад”. Ба қавли ӯ, омӯзгорро дигарбора барои муоинаи тиббии додгоҳӣ бурдаанд ва баъди гирифтани натиҷаи ташхис нисбат ба фарди гумонбар чора андешида мешавад.

Омӯзгор Муҳимҷон Раҳмонов идда дорад, ки бародари яке аз шогирдонаш ӯро латукӯб ва ҳам таҳдиди куштан кардааст. Ба гуфтаи ӯ, сабаби бадрафторӣ бо ӯ танҳо сарзаниши хонанда барои гапгардонӣ будааст.

Муҳимҷон Раҳмонов мегӯяд, баъди ин бародари шогирдаш ӯро ба мошин савор карда, бо мушту лагад заданд ва таҳқир карданд. Дар видеои сӯҳбати муаллим, ки дар шабакаҳои иҷтимоӣ аз ҷумла Фейсбук васеъ паҳн шудааст, ӯ мегӯяд, фарде, ки ба ӯ дарафтод, ҳамчунин гуфтааст, “падару модаратро фалон мекунам” ва сипас “ба рӯям туф кард.”

Ташхиси тиббӣ осеб дидани омӯзгорро тасдиқ кардааст. Касе, ки ӯро латукӯб кардааст Миралӣ Орзуев, соҳибкор будааст. Ӯ дар суҳбат ба Радиои Озодӣ гуфт, омӯзгорро назадааст, балки танҳо суҳбат карданд.

Нашри ин хабар дар Радиои Озодӣ вокунишҳои зиёдро дар шабакаҳои иҷтимоӣ ба миён овард. Бисёре аз корбарон талаб карданд, ки фарди гумонбар ба латукӯби омӯзгор сахт ҷазо гирад.

Шуъбаи маорифи ноҳияи Нуробод дар вокуниш ба ин қазия навишт, ба хонаи омӯзгор Муҳимҷон Раҳмонов рафта, ба ӯ кӯмак кардаанд. Аммо дар вокуниши идораи маориф дар бораи муҷозоти шахси гумонбар чизе гуфта нашудааст.

Шикояти муаллим аз латукӯб шуданаш дар ҳолест, ки соли гузашта дар Тоҷикистон қонун “дар бораи мақоми омӯзгор” қабул шуд. Ҳадаф аз ин қонун “баланд бардоштани мақоми омӯзгор, ҳифзи шаъну шарафи ӯ, фароҳам намудани заминаҳои мусоиди рушди касбият ва пешбинӣ намудани имтиёзҳои бештар барои онҳо” гуфта шуд.

Шикоят аз вазъи бади маорифи Тоҷикистон, музди кам дар соҳа, беқадрии муаллим, бадрафторӣ бо омӯзгор дар мактаб солҳо боз идома дорад.