«Гэта самае дрэннае і дарагое разьвязаньне, якое можна было б прапанаваць», мяркуе Ганна Скрыган, экалягіня, кандыдатка геаграфічных навук, прадстаўніца «Зялёнага Альянсу».

Раней на праспэкце Незалежнасьці зрэзалі дрэвы, а месцы вакол іх заклалі пліткай. Чыноўнікі патлумачылі: новыя ліпы будуць расьці не ў адкрытым грунце, а ў адмысловых кадках. Паводле афіцыйнай вэрсіі, раней дрэвы гібелі праз выхлапныя газы, дарожныя рэагенты і неспрыяльныя ўмовы для каранёў.

«У гэтых кадках з дрэвамі і кветкамі нічога няма, акрамя эстэтыкі. Гэта значыць, калі мы паглядзім з экалягічнага пункту, санітарныя функцыі зялёных насаджэньняў. Калі мы наогул зірнем на гэта шырэй, на адаптацыю да зьмены клімату, паніжэньне тэмпэратуры, такое памяншэньне цеплавой выспы, то гэтыя кадкі з дрэвамі не прыносяць нічога. Адно абмяжоўваюць разьвіцьцё каранёвай сыстэмы.

У іх могуць расьці толькі пэўныя віды дрэваў, якія не дасягаюць значнага памеру, не фармуюць разгалістых шатаў».

Паводле экспэрткі, дрэвы ў Менску сапраўды цярпяць ад пясчана-солевых сумесяў на вуліцах і дарогах, а таксама ад забруджанага паветра. Але яшчэ больш ім шкодзіць тое, што зямлю вакол закатваюць у асфальт і плітку.

Такім чынам, дажджавая вада часта папросту не даходзіць да каранёў. Найлепей было б, кажа экспэртка, пранікальная плітка і сыстэма, якая скіроўвала б дажджавую ваду да каранёў. Менавіта так цяпер робяць у многіх краінах Цэнтральнай і Ўсходняй Эўропы.

У сацыяльных сетках новае азеляненьне ўжо назвалі «ліпа ва ўсіх сэнсах».

«Ёсьць яшчэ табліцы, пачынаючы з савецкіх 50-х гадоў, калі гэты момант улічваўся, каб дрэвы расьлі хутчэй, выраблялі больш кіслароду, каб былі ўстойлівыя да забруджваньняў.

Ня ўсе гэтыя рэкамэндацыі пасуюць. Але так, дрэвы знаходзяцца ў прыгнечаным стане.

Акрамя пясчана-солевых сумесяў яшчэ зьяўляюцца шкоднікі, ізноў жа, з прычыны зьмены клімату, і яны зьнішчаюць дрэвы. Каштаны ў першую чаргу.

Ну, а самая галоўная рэч, што каранёвая сыстэма дрэў знаходзіцца ў прыгнечаным стане.

Ізноў жа, калі верыць статыстычным справаздачам Мінпрыроды аб якасці паветра ў нашых населеных пунктах, дык там усё выдатна. Гэта значыць, не было б з чаго засыхаць. Але праблема ў тым, што ў нас усё закатана ў асфальт, а скрозь плітку вада не пранікае ўглыбіню», — дадала Ганна Скрыган.