19/10/2026 a las 15:59h.

Angelun gertatutako 19 urteko gaztearen erailketa matxista gaitzesteko elkarretaratzera deitu du Zumaiako Mugimendu Feministak. Gazteak bere buruaz beste egin zuen pasa den ostiralean, bortxaketa bat jasan eta salatu ondoren. Erailketa matxista salatzeko elkarretaratzea astelehen honetan 19:00etan izango da Saregile plazan.

Era berean, Zumaiako Udalak gogor salatu nahi du Angelun gertatutakoa, eta elkartasun osoa adierazi nahi die emakume gaztearen senideei eta gertukoei.

Urte honetan indarkeria sexistaren ondorioz eraildako seigarren emakumea da Euskal Herrian. Udalak argi utzi nahi du «ez duela giza eskubideen urraketarik onartzen, ez Zumaian eta ez beste inon ere». Eta honen aurrean, herritar guztien inplikazioa eskatzen du. Izan ere, herritarron ardura ere bada indarkeria ororen aurrean jarrera aktiboan jokatzea.

Horrenbestez, Zumaiako Udalak bat egiten du Zumaiako Mugimendu Feministak egindako deialdiarekin eta herritar guztiei dei egiten die gaur 19:00etan, Saregile plazan egingo den elkarretaratzean parte hartzera.