Өлүөнэ өрүһү туоруур үс пилоннаах вантовай муоста тутуута сүрүн түһүмэҕэр таҕыста диэн «ВИС» бөлөххө иһитиннэрдилэр.

Билигин Өлүөнэ өрүс сүнньүгэр бара турар үлэни исписэлиистэр устуоруйаҕа хаалар тутуу сүрүн түһүмэҕинэн ааттыыллар. Бырайыакка олоҕуран икки коффердам туруорулунна.

Билигин Өлүөнэ эбэ кытылларыгар түөрт технологическай былаһаакка тэрилиннэ, хаҥас  кытыллааҕы эстакада бастакы тирэҕэ тутулунна, барыта 920 сыбаайаттан 365-э (40%) түһэрилиннэ. 26 тирэҕиттэн 12-тин (46%) 100% оҥоһулунна. Муостаҕа уҥа кытылтан киирэр суол буорун кутуу үлэтэ барар. Уһуна —  5,5 км буолуоҕа. Барыта 2,8 мөл. куб. м. кэриҥэ буор кутуллуохтаах, бүгүҥҥү күҥҥэ суол олоҕор 730 тыһ. куб. м. тахса буор кутулунна. 300-тэн тахса исписэлиис уонна 70 кэриҥэ тиэхиньикэ күнүстэри-түүннэри үлэлииллэр.

Муоста уҥа пилонугар анаммыт коффердамы туруорууга бырайыагынан  үлэтэ үс хонукка уһатылла сылдьыбыта. 17,5 миэтэрэ үрдүктээх улахан тимир конструкцияны уҥа кытылтан 300 миэтэрэ ыраах буксирынан соһон аҕалан бөҕөргөппүттэрэ. Атырдьах ыйын 21 күнүгэр коффердамы былаан быһыытынан ууга тимирдэн, Өлүөнэ эбэ түгэҕэр туруорбуттара. Бу иннинэ киин пилоҥҥа аналлаах саамай улахан коффердам бырайыакка олоҕуран туруоруллубута. Диаметра – 46 миэтэрэ, уопсай ыйааһына – 4 тыһ. туонна кэриҥэ.

Коффердамнар истэригэр тимир араамаларга буронабивной сыбаайалары түһэрэргэ аналлаах буровой установкалар тураллар. Икки коффердамҥа биэс буровой массыына үлэлиир.

Муоста саамай улахан пилонун үрдүгэ — 284,5 м. Үрдүгүн 90 этээстээх дьиэни кытта тэҥниэххэ сөп. Балтараа миэтэрэ диаметрдаах, 27 миэтэрэттэн тахса уһуннаах 208 буронабивной сыбаайа түһэриллиэҕэ. Бу сыбаайалары оҥорорго 10 тыһыынчаттан тахса кубометр бетон наада буолуоҕа. Билиҥҥи туругунан 52 сыбаайа түстэ — ити уопсай ахсаантан 25%. Уҥа коффердамҥа бүгүҥҥү күҥҥэ 10 буронабивной сыбаайа бэлэм. Бу өрүс мууһа туруутун саҕана элбэх туонналаах тимир конструкциялар бигэ туруктаах буолалларын хааччыйыаҕа.

Өлүөнэ муостата Арассыыйа саамай улахан концессионнай бырайыактарыттан биирдэстэрэ. Бырайыак федеральнай, эрэгийиэннээҕи бүддьүөттэр уонна бүддьүөтү таһынан үбүлээһин суотугар олоххо киирэр. Хапытаалынай ороскуот 170 млрд солкуобайы куоһарар, тутуу түһүмэҕэр чааһынай инвестиция өлүүтэ 47% тэҥнэһэр.

Муоста Саха сирин Бырабыыталыстыбатын уонна «ВИС» Бөлөх икки ардыларынааҕы концессия сөбүлэһиитинэн тутуллар уонна «Олох-дьаһах инфраструктурата» нацбырайыакка уонна Дьокуускай куорат маастар-былааныгар киирбитэ.

Концессионер 2048 сылга диэри инфраструктураны бырайыактааһыҥҥа, тутууга уонна үлэлэтиигэ эппиэттиир. Чааһынай инвестор киллэрбит үбүн төннөрүү концессионнай бырайыак үлэлиир болдьоҕун тухары тэнийэр — инньэ гынан, федеральнай уонна өрөспүүбүлүкэ бүддьүөттэригэр биир бириэмэҕэ улаханнык ноҕуруускаламмат: судаарыстыба тутуллубут муостаны сыыйа төлөһөн иһиэҕэ.

Өлүөнэ муостата аан дойдуга 100°С кыраадыска тиийэр температура уларыйар, ирбэт тоҥ буордаах уонна сир хамсыыр кутталлаах Арктика зонатыгар тутуллубут соҕотох муостанан буолуоҕа.  4,6 км уһуннаах вантовай муоста сыл устата тырааныспар айан-сырыытынан хааччыйыаҕа. Саҥа тырааныспар суолун уопсай уһуна 14,5 км буолуоҕа. «Өлүөнэ» уонна «Халыма» федеральнай суоллары «Бүлүү» суолун кытта, ол эбэтэр дьиҥинэн Арассыыйа илин өттүн Охотскай байҕал кытылын кытта ситимниэҕэ.

Саҥа муоста хотугу таһаҕаһы хааччыйыыга бүддьүөт ороскуотун аччатарга кыах биэриэҕэ.