Амма улууһугар Саха сирин баһылыга Айсен Николаев агробырамыысыланнас комплексын боппуруостарыгар сүбэ мунньаҕы ыытта. Онно 2026 сыллааҕы сүөһү аһылыгын уонна хомуур хампаанньатын барыллаан түмүктэрин таһаардылар уонна кэлэр сылга аграрнай сектор тутаах соруктарын быһаардылар.

“Төһө да ыараханын иһин, биһиги аграрийдарбыт сыралаах үлэлэринэн ыһыы, хомуур уонна сүөһү аһылыгын бэлэмнээһин үлэлэригэр туруоруллубут сыаллар уонна соруктар толорулуннулар. Халааны аҕалбыт ардах да түспүтэ уонна сорох оройуоннарга курааннаабыта. Тыа сирин олохтоохторугар ситиспит түмүктэрин, түмсүүлээхтэрин иһин махтанабын”, — диэтэ аграрийдарга Айсен Николаев.

Уһулуччу болҕомто өрөспүүбүлүкэ үүт салаатын сайыннарыыга уурулунна. Быйылгы сылга атыылаһыллыбыт бородууксуйа кээмэйэ 52,3 тыһыынча туоннаҕа тэҥнэстэ, ити сыллааҕы былаан 94,5%  тэҥнэһэр. Эрэгийиэҥҥэ үүт салаатыгар 3,5 млрд солк. көрүллүбүтэ. Бу туһунан Саха сирин Бырабыыталыстыбатын Бэрэссэдээтэлин солбуйааччы Сергей Местников иһитиннэрдэ. “Оройуоннар чахчыларынан, сыл бүтүөр диэри 63,7 тыһыынча туонна үүтү соҕотуопкалааһын уонна астааһын күүтүллэр. Бүгүҥҥү туругунан үүт соҕотуопкатын Горнай, Кэбээйи, Мииринэй, Нам, Өлүөхүмэ, Сунтаар оройуоннара толордулар”, — диэтэ вице-премьер.

Саха сирин баһылыга салаа салгыы сайдыытыгар кэккэ сорудахтары биэрдэ. “Бырабыыталыстыба быйыл көрүллүбүт өйөбүл үбүн  тыа сирин кэтэх хаһаайыстыбаларыгар барытын тиэрдиэхтээх. Сыл бүтүөр диэри 63,7 тыһыынча туонна үүт соҕотуокаланыаҕа уонна астаныаҕа. 2027 сылга өрөспүүбүлүкэ бүддьүөтүн иккис ааҕыытыгар Саха сирин агробырамыысыланнас комплексыгар ыытыллар федеральнай даҕаны уонна өрөспүүбүлүкэтээҕи үбү-харчыны көрдөрүөххэ. Маныаха тыа хаһаайыстыбатын өйөбүлүн кээмэйэ быйылгы үптэн кырата суох буолуохтах. Сүрүн сыал – тыа хаһаайыстыбатын бэйэ бородууксуйатын элбэҕи оҥоруу. Хаһаайыстыбалар сайдыахтаахтар, оттон тыа сирин олохтоохторо бэйэлэрин үлэлэриттэн дьоһун дохуоту аахсыахтаахтар”, — диэтэ Айсен Николаев.

Өрөспүүбүлүкэ 19 оройуонугар уонна “Дьокуускай куорат” куораттааҕы уокурукка үүтү тутар 56 соҕотуопка тэрилтэтэ баар. Сүбэ мунньахха тыа хаһаайыстыбатын сезоннааҕы үлэтин түмүктэрин, кыһалҕалаах боппуруостары көрдүлэр. Түмүгү таһаарарыгар Айсен Николаев тыа хаһаайыстыбатын кэлэр сезонугар хаачыстыбалаахтык бэлэмнэнэргэ, быйылгы боппуруостары быһаарарга кэккэ сорудахтары биэрдэ.