28/08/2026 a las 17:39h.

Anaitasuna Mendi Bazkunak 'Gure txokuk ezagutzen' egitasmoaren barruan irteera antolatu du irailaren 12rako. Joan zen maiatzean eguraldiagatik bertan behera utzi zuten egun osoko txangoa izango da, Orreagatik Orbaizetako fabrikara arteko (Nafarroa) ibilbidea hain zuzen. Parte hartu nahi dutenek aldez aurretik eman beharko dute izena.

Irteera Azkoitiko liburutegitik 07:00etan egingo dute autobusez. Antolatzaileek ohartarazi dutenez, autobusa garaiz hartzeko, aurrez bertaratzea komeni da. Behin hasierako puntura iritsita, 10:00ak aldera hasiko dute oinezko ibilbidea: Orreaga, Urkulu, Azpegi, Mendilatz, eta Orbaitzetako fabrika. 16,5 kilometro eta 650 metroko desnibel positiboa dituen ibilbideak bost ordu inguruko iraupena izango duela aurreikusten dute.

Bazkaria ibilbidean zehar edo amaitzean egingo dute. Horretarako, parte-hartzaile bakoitzak bere janaria eta edaria eraman beharko ditu. Jarduera amaitutakoan, autobusez itzuliko dira Azkoitira.

Parte hartzeko prezioa 15 eurokoa da bazkideentzat eta 20 eurokoa bazkide ez direnentzat, eta bidaiaren kostua prezioan sartuta dago.

Izena emateko epea irailaren 11n amaituko da, edo plazak agortu arte. Parte hartu nahi dutenek Anaitasuna Mendi Bazkunak horretarako prestatutako galdetegia bete beharko dute.