På Jømna utanfor Elverum produserer gründerbedrifta Solskifer AS den einaste solcelletaksteinen i landet.

Medan Noreg og verda skrik etter meir solkraft, skrik verksemda etter høgare etterspørsel.

For andre gong på kort tid må selskapet igjen permittere tilsette.

Styresmaktene vil at Noreg skal ha mykje meir solenergi. Men Noregs einaste produsent av solskifer har for få ordrar og må permittere tilsette.

– Situasjonen er avventande. Vi må opp i høgare volum, seier dagleg leiar, Bengt Arne Storsveen.

– Vi har mykje større kapasitet i anlegget her enn det vi nyttar i dag, og ønsker eit høgare volum og ein større ordrereserve.

I 2023 sette Noreg eit mål om at 8 terawattimar (TWh) av straumforbruket i landet skulle kome frå solkraft innan 2030.

I ein rapport frå Enova frå tidlegare i år, kom det fram at Noreg så langt har bygd ut 0,7 TWh solkraft. I same rapport anslår prognosen ein samla produksjon på litt under 2 TWh i 2030, noko som er langt under Noregs målsetting.

Storsveen meiner manglande insentiv til forbrukarane gjer det vanskeleg for selskapet å få opp salet til privatpersonar.

– Dei har eit mål om 8 TWh innan 2030, men det er vi veldig langt unna å nå. Skal vi nå målet, må insentivordningane bli betre. Solinstallasjonar i Noreg no er forholdsvis dyrt, seier han.

Leiar av energi- og miljøkomiteen på Stortinget, Mani Hussaini (Ap), er ikkje i tvil om at det trengst meir solproduksjon i Noreg.

Medan enkelte har lagt skulda på noregspris for fallande etterspørsel på solceller, meiner Hussaini noregspris aleine ikkje er skyld i fallet.

– Eg trur, og det kjenner eg på sjølv òg, at på grunn av dyrtid og høg rente er det veldig mange som vel bort denne typen prosjekt, seier Hussaini.

Han vil likevel ikkje utelukke at politikarane må ta grep for å dytte marknaden i rett retning.

– Vi må sjå på støtteordningane vi har i dag, og sjå om dei fungerer godt nok. Vi må sjå på støtta til Enova og Husbanken, og vurdere om vi kan gjere enda meir for å lykkast.

For verksemda i Elverum er håpet at betre støtteordningar raskt skal gjere det meir lønsamt å investere i solceller igjen.

– Det er eit paradoks. Vi ønsker solenergi, men det blir ikkje lagt til rette for at det skal rullast ut verken til privatmarknaden eller verksemder, meiner dagleg leiar Bengt Arne Storsveen.