Маштабнае даследаванне з удзелам больш як 67 тысяч чалавек паказала: узрост значна мацней уплывае на сэксуальнае жаданне, чым адносіны, адукацыя ці нават наяўнасць дзяцей. І галоўны сюрпрыз — мужчыны дасягаюць піку лібіда не ў маладосці.

Ілюстрацыйнае фота: прэсавая служба МУС

Каманда даследчыкаў з Эстоніі і Вялікабрытаніі прааналізавала даныя 67 334 дарослых з эстонскага біябанка. Узрост удзельнікаў вагаўся ад 20 да 84 гадоў, сярэдні складаў 47 гадоў. Аб выніках расказвае FitBook.de.

Мэта даследавання — зразумець, як дэмаграфічныя і жыццёвыя фактары звязаныя з індывідуальным узроўнем сэксуальнага жадання. Улічваліся пол, узрост, сэксуальная арыентацыя, статус у адносінах, колькасць дзяцей, нядаўнія роды, адукацыя, прафесія і задаволенасць партнёрствам.

Апытанне праводзілася анлайн з лістапада 2021 да красавіка 2022 года. Сэксуальнае жаданне ацэньвалі праз дзве сцвярджальныя фразы:

— «Я маю моцнае сэксуальнае жаданне»;

— «Я не часта думаю пра сэкс».

Адказы статыстычна апрацавалі і параўналі паміж рознымі групамі. Даследчыкі выкарыстоўвалі як простыя параўнанні, так і складаную рэгрэсіўную мадэль, у якой усе фактары аналізаваліся адначасова.

У выніку поўная мадэль патлумачыла 28,3% адрозненняў у ўзроўні сэксуальнага жадання — для псіхалагічных даследаванняў гэта высокі паказчык.

Найбольш значнымі прадказальнікамі аказаліся пол і ўзрост. Мужчыны ва ўсіх узроставых групах паведамлялі пра больш высокі ўзровень жадання, чым жанчыны. Пры гэтым розніца з гадамі толькі павялічвалася і была найбольш выразнай пасля 60 гадоў.

У цэлым з узростам лібіда змяншаецца, але ў жанчын гэты спад значна мацнейшы. Аднак самае нечаканае — узроставы пік.

Жанчыны дэманструюць найвышэйшы сярэдні ўзровень жадання ў пачатку трэцяга дзясятка. Мужчыны ж дасягаюць свайго піку прыкладна ў 40 гадоў — значна пазней, чым звычайна лічыцца.

Даследаванне таксама паказала, што мужчынскае жаданне адносна стабільнае на працягу жыцця. У жанчын жа яно больш зменлівае і адчувальнае да жыццёвых этапаў — цяжарнасці, менапаўзы, а таксама да нагрузкі, звязанай з клопатам пра дзяцей.

Статус у адносінах уплываў нязначна: людзі ў партнёрстве мелі крыху вышэйшыя паказчыкі, чым адзінокія.

Наяўнасць дзяцей і нядаўнія роды паказалі слабую, але статыстычна значную сувязь. Людзі без дзяцей або тыя, у каго дзіця з’явілася цягам апошняга года, мелі крыху вышэйшы ўзровень жадання.

Прафесійныя групы адрозніваліся мацней, чым чакалася. Вышэйшыя паказчыкі адзначаліся ў ваеннаслужачых, аператараў машын і кіраўнікоў (менеджараў), ніжэйшыя — у шараговых офісных супрацоўнікаў і дапаможных рабочых. Адукацыя практычна не ўплывала на вынікі.

Вынікі падкрэсліваюць, што біялагічныя і сацыяльныя фактары дзейнічаюць разам. Гармоны, такія як тэстастэрон, безумоўна важныя, але не менш істотныя сацыяльныя ролі, чаканні і жыццёвыя абставіны.

Той факт, што мужчыны дасягаюць піку жадання каля 40 гадоў, можа быць звязаны са стабільнымі адносінамі, большай эмацыйнай блізкасцю або зменай прыярытэтаў у сярэднім узросце.

Цікавым з'яўляецца і ўплыў бацькоўскай ролі: у той час як мужчыны з большай колькасцю дзяцей, як правіла, паведамляюць пра больш высокае сэксуальнае жаданне, у жанчын яно зніжаецца. Гэта дазваляе меркаваць, што клопат пра дзяцей і звязаная з гэтым нагрузка па-рознаму ўплываюць на адчуванне жадання.

Даследчыкі мяркуюць, што атрыманыя імі даныя могуць быць карыснымі для развіцця сэксалагічнай і псіхатэрапеўтычнай дапамогі — з улікам узросту, сямейнага статусу і жыццёвай сітуацыі чалавека.

Нягледзячы на маштаб, даследаванне мае шэраг абмежаванняў. Сэксуальнае жаданне вымяралася толькі двума агульнымі сцвярджэннямі без падзелу на партнёрскую і індывідуальную матывацыю. Таксама не браліся пад увагу псіхалагічныя аспекты, такія як тып асобы, эмацыйныя патрэбы або мадэлі паводзін у адносінах.

Аўтары адзначаюць са спасылкай на папярэднія даследаванні, што гэтыя фактары маглі б растлумачыць дадатковыя 10—15 працэнтаў варыятыўнасці вынікаў.

Акрамя таго, звесткі грунтуюцца на самаацэнцы рэспандэнтаў, а ў тэмах сэксуальнасці людзі могуць падсвядома карэктаваць адказы пад сацыяльныя нормы.

Усе навіны →