Klokka 06.45 fekk naudetatane melding om at ein større båt hadde kollidert med kaia i Os i Bjørnafjorden.

Det er fem personar om bord. Ingen av dei er skadde, men det er større materielle skader på trebrygga, melder operasjonsleiar Tore-Andre Brakstad i Vest politidistrikt.

Båten er ein fraktebåt på 58 meter. Ifølge politiet er både båten og kapteinen norsk.

Politiet har snakka med kapteinen om bord. Det er ikkje mistanke om promille.

– Det kan vere tekniske problem som er årsaka til krasjen, skriv Brakstad i ei oppdatering like før 08.30.

Kapteinen har forklart at han skulle rygge då det gjekk gale.

– Vi er på staden og dokumenterer, og så tek vi ei vurdering om vi skal etterforske saka vidare, seier Brakstad.

Båten har ei gravemaskin om bord.

Det var ein nabo i området som varsla 110 Vest om hendinga.

– Ho fortalde at ho høyrde eit høgt smell frå Hamnevegen og det viste seg å vere ein stor båt som hadde gått i kaia, seier Frode Eide.

110 Vest var i SAR-varsling med hovudredningssentralen.

Brannvesenet jobbar med å sikre brygga sidan den har fått ein god del skader, seier Eide.

Båten blir no taua vekk frå staden, opplyser NRK sin reporter på staden.