Per Jarle Myklebust står på jordet og studerer graset.

– Vi skulle slått graset for minst ei veke sidan. No taper kvaliteten seg for kvar dag, seier han.

Her i Myklebustdalen i Nordfjord bøtter regnet ned.

Blaut mark gjer det umogleg å slå graset, og vêrmeldinga framover er ikkje særleg lystig.

– Protein- og sukkerinnhaldet i fôret går ned. Då må vi kompensere med meir kraftfôr.

Ekstrarekninga kan bli på 200.000 kroner, trur Myklebust.

Situasjonen er lik på store delar av Vestlandet. Bønder i Trøndelag og i Nord-Noreg har same å stri med.

I tillegg var førsteslåtten dårleg for mange.

Statsforvaltaren i Vestland har fått inn 75 meldingar om sviktande avlingar hittil. Det meste gjeld fruktproduksjon. Tala aukar for kvar dag.

– Vi har betydeleg fleire meldingar så langt i år enn tidlegare. Det har vore ein veldig spesiell sommar, seier assisterande landbruksdirektør hos statsforvaltaren, Bjørn-Harald Haugsvær.

Dei siste åra har variasjonane vore store. For berre to år sidan var det tørke i Myklebustdalen.

Klimaforskarar seier at store variasjonar vil bli vanlegare – både meir tørke og meir vatn.

– Det er eigentleg veldig vanskeleg for bøndene å tilpasse seg klimaendringane, seier forskar Synnøve Rivedal ved Nibio.

Likevel er det noko som blir viktig framover, ifølge Rivedal:

1. Bruk av ulike artar gras på same mark, som toler vêret ulikt. Risikoen for at heile avlinga ryk, blir mindre.
2. Utnytting av den tidlegare sesongen. Sidan hausten statistisk sett blir våtare, blir det viktigare å komme i gang tidlegare.
3. Investering i effektive maskinar. Periodane med optimalt slåttevêr blir kortare. Då gjeld det å smi mens jernet er varmt.
4. Optimal drenering og tiltak for å få vatn vekk.

Rivedal seier det uføreseielege vêret vil drive kostnadane oppover, til dømes å investere i maskinar.

Viss alternativet blir å kjøpe endå meir fôr, har bøndene i realiteten ikkje mykje val.

– Så er jo resten av verda meir utsett for tørke. Vi er nøydde til å produsere vår eigen mat. Det er viktig, seier Rivedal.

Myklebust har håp om opplett neste veke. Får han slått graset då, blir det ikkje katastrofalt.

– Viss du skal gå og sjå mørkt på ting, da er ikkje bondeyrket det rette. Da må du sjå litt lyst på livet, seier han.