16/01/2026 a las 10:00h.

Académicu de la Llingua, periodista, profesor, escritor y activista cultural, Inaciu Galán (Xixón, 1986) algamaba el I Premiu 'Yolanda Huergo' d'ensayu cola so obra 'Los cuartos propios de la lliteratura asturiana. Una conversación colectiva', publicada agora pol sellu Trabe. Dende la oficina de la so productora Cuatro Gotes el so autor desplica que'l guañu d'esti trabayu surdió en faciendo el documental 'Elles. Les muyeres na lliteratura asturiana' (2017): «Ye un tema que me paecía bien interesante, quedé con ganes d'afondar más, tenía material coles entrevistes que grabara y quixe amplialu con otres. El propósitu de la investigación yera dar una imaxe más completa de les muyeres na lliteratura asturiana. Hai cuestiones mui interesantes, muncha calidá y sobre too un gran futuru. Tamos nun momentu mui importante y con mui bones perspectives per delantre. Una amuesa d'ello fueron los premios lliterarios del últimu añu que los algamamaron mayoritariamente muyeres».

Una mirada a la historia de la nuestra lliteratura dexa ver pa Galán «que'l machismu, como socedió en tolos ámbitos, tapeció munches voces de muyeres que se tan descubriendo agora. Nomes como los de l'avilesina Matilde de Soigne, que tuvo nel so momentu un gran ésitu ente la emigración de Cuba. Apocayá l'Academia premiaba un trabayu d'Iván Cuevas sobre otra autora , Paulina Ciaño. Vamos descubriendo munchos d'esos nomes tapecíos y lo más interesante la so calidá. Tenemos a Xosefa Xovellanos que ta considerada la meyor autora del so sieglu, pongo por casu. El mio enfotu yera xuntales a toes y que caltuvieran esi diálogu, nel que'l mio papel ye cuasimente de narrador porque elles son les protagonistes absolutes», apunta l'escritor.

Frutu d'esi llabor ye la nómina d'alredor de setenta o ochenta muyeres entrevistaes, inda quedaran fuera, como matiza l'invetigador «voces nueves que fueron surdiendo nos últimos años, non namás xente mozo, tamién autores que publicaran ya con una cierta edá obres que teníen en caxón o en xéneros que nun cultivaran enantes, como'l casu de Berta Piñán na novela».

Una vez publicáu el llibru, la intención del so autor ye dir presentándolu con diálogos ente diferentes autores «pa que sigan siendo elles les principales protagonistes, porque esti trabayu ye pa min un homenaxe y una reivindicación del papel que cumplieron y siguen cumpliendo na lliteratura asturiana. Toi d'alcuerdu con Marta Mori nel prólogu que lo ideal ye que lo entamara una muyer, pero tamién cuento que los homes tenemos que formar parte de la llucha feminista. Y anque el protagonismu seya d'elles tenemos de tar ehí tamién aportando lo que podamos».

Nesti últimu aspectu, Galán sorraya que «a la so manera toles muyeres a lo llargo de la historia de la lliteratura asturiana fueron feministes nos sos posicionamientos y forma de vida. Son muyeres avanzaes al so tiempu, dende la citada Xosefa Xovellanos, Enriqueta González Rubín, autora de la primer novela n'asturianu, una madre soltera que foi periodista o Xosefa Canellada, llingüista importante y pionera de la lliteratura infantil o que la primer Academia en 1919 tuviere una estaya de muyeres», enumera l'investigador. «Güei son una pieza angular na lliteratura».