20/02/2026 a las 10:00h.

E l pasáu 2025 foi un añu provechosu pa la escena musical del país. Asina lo reflexa l'Anuariu de la Música Asturiana (AMA), editáu por Goxe Producciones, na so entrega nueva que repasa les tendencies ya inquietúes nel panorama autóctonu dende l'anterior y fai recuentu de la producción discográfica nesi periodu. Un total de 57 grabaciones, ente álbumes, epés y singles foi el balance del añu que finó. Nelles hai amueses de tolos estilos: folk, pop,. rock, punk, electrónica, tonada, etc. y caltiense l'enclín de los últimos años en cuantes al predominiu de l'autoedición y de la publicación dixital. El puxu de les actuaciones en directu, ya seya en forma de festivales o conciertos en sales, ye otru de los fechos que se resalta dende'l mesmu entamu de la publicación, nel que s'apuesta por un apoyu más curiosu a eses actividaes y también meyor cobertura de les mesmes polos medios públicos autonómicos.

L'últimu añu foi tamién de perdes irreparables nel ámbitu de la cultura asturiana. A les de Xuan Bello, David Rivas, Fran Gayo, José Luis Cienfuegos , Jorge Martínez o Damián Barreiro, remembra con emoción l'escritor Dolfo Camilo Díaz nel so artículu 'Solaris' y al caberu d'ellos, el periodista avilesín y activista polos derechos llingüísticos dedícase-y la pieza cola que s'abre l'AMA: 'N'alcordanza. Una vida al serviciu d'Asturies.

La cantautora Marisa Valle Roso protagoniza la portada del Anuariu y una entrevista a cuentu del so recién discu 'Cenicientes'. Otres dos figures destacaes de la música asturiana: Rubén Bada y Héctor Braga, son entrevistaos, el primeru, pa falar del so triple álbum de debú en solitariu y el segundu, a propósitu del asoleyamientu del ensayu sobre l'asturianada col qu'algamó el Premiu Máximo Fuertes Acevedo.

El técnicu cultural Daniel Cueli firma les cróniques: 'Un añu importante pa la gaita', 'Asturies escenariu celta' y 'El Celtic Connections y el FIL n'Asturies', mientres el cantante y comunicador Xune Elipe glosa l'apueste polos nuevos soníos y el folk de cámara en 'La elegancia de la música asturiana.Pel so llau, el músicu Héctor M.Aneiros recuerre l'alcordanza de les formaciones surdíes na contorna avilesina nel artículu 'El soníu Avilés na música celta: xénesis y evolución d'una identidá. Y el periodista Xicu Arizu publica l'informe'La mocedá garra puxu na música asturiana.

Nel capítulu d'ensayos, l'escritor y psiquiatra Inaciu Llope reflexona sobre 'Tradición y folklor', l'antropóloga Irene Faza fai lo propio alrodiu de 'Nomar pa resistir' y l'historiador Rafa R. Valdés publica un ampliu estudiu sobre 'La música como atracción y estructura de la cultura política del movimientu obreru asturianu a primeros del sieglu XX'. Otru de los trabayos d'investigación d'esta entrega nueva de l'AMA, ye'l de recoyida de material etnográficu 'Dellos músicos populares del conceyu d'Uviéu' que firma l'estudiosu y divulgador Alberto Álvarez Peña.

Los premios Obdulia Álvarez 'La Busdonga' d'asturianada y el Camaretá al Meyor Cantar N'Asturianu tamién son remembraos nes páxines del Anuariu, xunta la presencia na parriella de la radiotelevisión autonómica del programa 'Al son', dedicáu a l'actualidá de la escena musical asturiana.

La avezada sección final d'Anuncies y el recuentu de los discos producíos a lo llargo de 2026 piesllen un AMA que ya ta distribuíu na versión impresa y tamièn na dixital.