Iruñerriko euskal komunitatearen irrati izateko asmoz sortu zen Euskalerria Irratia, eta 38 denboraldi beranduago hala izaten jarraitzen duela erakutsi genuen joan den ostiralean Katakraken egindako zizka-mizkan. 2025-2026 denboraldian ia 200 kolaboratzailek parte hartu dute, jakintza alor, joera ideologiko, lanbide eta adin askotarikoak. Egindako lan ordainezina eskertzeko modua izan zen ostiraleko ekitaldia, baina ez hori bakarrik, baita elkartzeko eta ospatzeko aitzakia ere. 

Irratira aldaketa haizeak datozen honetan, oinak lurrari lotuta mantentzeko oinarrizkoa izaten jarraitzen du irratiaren komunitate osoak, eta komunitate horren ordezkari izan zineten ostiralean bertaratutakoak. Aldaketaren lehen seinale gisa, irratiaren egoitza berria izango denaren atarian jarri genuen gure photocall-a, eraikinean oraindik akitu ez den obraren aldamio pean. Laster zabalduko dira ate horiek, zentzu literalean. Bien bitartean, ospatzen jarraitzeko aitzakiak baliatuko ditugu gure sarea indartzen jarraitzeko. Bejondeizuela!