Udalak ohar bidez azaldu duenez, harreman ugari izan dituzte bai foru aldundiarekin zein Eusko Jaurlaritzarekin, eta bisita bateratua ere egin zuten birgaitzeetan espezializatutako teknikariekin, Eusko Jaurlaritzaren Etxebizitza saileko ordezkariekin eta udaleko arduradunekin. Ondorioa izan zen eraikinak ez zuela berehalako kolapso arriskurik, eta, are gehiago, bizileku modura egokitzeko eta erabiltzeko aukera zegoela.

Alta, Murgiako Karitateko ahizpek komentua eraisteko erabakiarekin aurrera egitea erabaki dute "kongregazioaren goiko organoetan erabakia hartuta zegoela argudiatuta", esan du udalak. Bilerarik ere ez dute egin nahi izan udal ordezkariekin gaia aztertzeko.

Udalak esan du ez duela kongregazioaren erabakia ulertzen: "kongregazioak argudiatzen dituen balizko arrisku guztiak bere gain hartuko lituzke udalak", azpimarratu dute.

Udalaren proiektua

Zuiako alkatearen irudikoz, eraisketa "galera handia da" alde guztietatik. Eraikin horri etapa bat gehiago emateko aukera zegoela azpimarratu du Gutierrezek, eta horrek "eragin sozial positibo ukaezina" izango lukeela herrian. "Inguru horri bizia emango lioke, batez ere gaztea, eta, zoritxarrez, gure gizartean hain urrunak diren bi errealitate batuko lituzke".

Udalaren proiektuak eraikinaren zatirik handiena bizitegi erabilerarako baliatzea aurreikusten zuen, erabilera publikoko espazio komunak egokitzea ere, baita zerbitzu edo merkataritza espazioak ere.

Karitateko Ahizpen komentua elizaren bolumen nagusiaren inguruan garatutako eraikina da, 1867koa. Fatxada neoklasikoa du, frontoi kurbatua eta molduraz apaindua. 5.500 metro karratu baino gehiago ditu eta urteetan hainbat erabilera izan ditu; kultu kristauarekin lotutakoaz beste, hezkuntza jarduerak garatu dira bertan eta egoitza bezala erabili dute.