Mutrikuarrek herrian errotuta dagoen Gaba Beltza festaren edizio berri batekin disfrutatzeko aukera izango dute datozen egunotan. Hala ere, aurtengoa ezberdina izango da; jaiaren antolakuntzan parte hartzen duten herriko talde eta eragileek «Gaba Beltzaren jatorri herrikoia berreskuratzeko ahalegina» egin dutelako.

Mutrikuko Gaba Beltza jaiaren antolakuntzan Gure Ametsa dantza taldeak, Txantxangorri aisialdi taldeak, Lapatxoko gaztelekuak, Mutrikuko gaztetxeak, herriko hiru ikastetxeek eta Udaleko Kultura sailak hartzen dute parte; eta horrezgain, Akordeoi taldeak eta Txistu taldeak ere parte hartzen dute kalejiran.

Mutrikuko Udaletik azaldu dutenez, «iaz, dantza taldeak, antolaketan parte hartzen dugun guztiok elkartzea proposatu zuen, azken urteetan egun hau hartzen ari zen 'Haloween kutsuagatik' kezkatuta».

Kezka horrekin bat egin zuen lantalde osoak; eta «ospakizun honen jatorri herrikoia berreskuratzeko eta bistaratzeko zerbait egin beharra zegoela» ikusi ere. Hori dela eta, urte honen hasieran Gaba Beltzaren eta Euskal Herriko neguko festen inguruko hitzaldi bat burutu zen herrian, «eragileok gaiaren inguruan jazteko».

Era beran, «aurtengo egitaraua osatzerakoan eragile bakoitzak bere esparruan helburu hau lortzeko pausuak emateko konpromisoa» hartu zuen.

Beraz, «guzti honen emaitza» izango da aurtengo Gaba Beltza festarako prestatutako egitaraua.

Gaba Beltzaren jatorri herrikoia berreskuratzeko saiakera horretan, festaren antolakuntza taldeak indar berezia eman nahi izan dizkie Axuri Beltza kalejirari eta Talaixako Mamuaren erretze ekitaldiari.

Horretarako, «partaideen adin tartea zabaldu da, mozorro eta jantziak zaintzeko ahalegin berezia egin da eta Mutrikuko Talaixako Mamuaren ipuinari protagonismo gehiago eman nahi izan zaio».

2026ko Gaba Beltza jaiari hasiera emateko 2013an eta 2014an jaiotako gaztetxoentzako 'Beldurren Kutxa' izango da igande honetan bertan (18:00etan) Gaztelekuan.

Behin abiatuta, egitarauak datorren asteazkenean izango du jarraipena, Lur Usabiaga kontalariak 6 urtetik aurerako haurrentzat Udal Liburutegian (16:30etik 18:30era bitartean) eskaniko dituen 'Ipuin ihesgela' kontakizunaren saioekin (gonbidapena behar da).

Hilaren 30ean, berriz, 2009-2014 urteetan jaiotakoentzako Ihes Gela egongo da gaztelekuan baina, hala ere, urriaren 31koa izango da festa honen egunik nabarmenena.

Jadunaldi horretan haurrentzako ekintzak izango dira, goiz eta arratsaldez, Txantxangorri aisialdi taldearen eskutik. Era berean, 19:30ean Axuri Beltza kalejira eta Talaixako Mamua erretzeko ekitaldia hasiko dira Goiko Plazan; eta 22:30etik aurrera Laumono eta Ehun Kilo taldeen kontzertuekin gozatu ahalko da Beheko Plazan.

Aurtengo programa borobiltzeko beldurrezko film emanaldiak egongo dira azaroaren 1ean Zabielen (16:00etan 2009-2012 urteetan jaiotakoentzat eta 18:00etan 2013-2014 urteetan jaiotakoentzat).