Dexé pasar un par de selmanes desque ficimos una doble celebración en formatu de gala pa conmemorar los 25 primeros años d'El Llar de ... Corvera, casa abierta dende la so apertura pa tolos amantes de la escena, en cualisquier de les sos formes... Y dexelo pasar pa dar tiempu a la cabeza a aposentar al respetive. Resulta bien complicao analizar con frialdá el cuartu de sieglu d'una infraestructura que se paez, como poques, al pueblu que-y da sintíu: Corvera... Y resulta percomplicao porque yes parte d'ello, porque (Tito a los mandos técnicos, yo a los mandos programáticos) somos parte d'esi Llar. Y más complicao resulta cuando conciden nel tiempu llínies d'actividá tan complexes como les fiestes de Corvera, la Nueche Blanca o eses mesmes gales dedicaes al Teatru cola plana mayor de la escena del país implicada nel eventu.