18/09/2026 a las 10:00h.

Iyán Caldevilla (Xixón, 1995) algamó l'últimu Premiu Asturies Xoven de Narrativa col so llibru 'Panéxiricos pa los qu'escaecieron volver' (Trabe). Graduáu en Física y Máster en Desarrollu de Videoxuegos, fálanos de la so ópera prima en llingua asturiana y tamién de les sos inquietúes como creador.

–¿Qué supón esti premiu pa dalguién que presenta una ópera prima?

–Nun contaba con ello precisamente porque ye la primer vegada queme presento a una cosa asina y la verdá parezme qu'esti tipu d'oportunidaes son un sofitu mui grande que t'anima a siguir escribiendo, porque nun ye el premiu namás, sinón la valoración que fai el xuráu del to trabayu, que te diga que lo que faes ta bien. Cuando tas entamando y enséñeslo a la xente ye difícil da-yos credibilidá porque cuesta estremar cuánto hai de cierto y cuánto de ciñu.

–Nun ye avezao debutar con un conxuntu de cuentos y amás xuníos por un filu temáticu. ¿Qué lu afaló a concebilo d'esta manera?

–Cuando entamé a pensar cuála yera la temática principal que yo quería abordar, caí na cuenta de qu'había munches coses que quería contar, que taben relacionadas, porque toles coses que yo cuento, al final conformen un poco el mio ser, pero nun quería construir histories y personaxes. Los personaxes, como les persones son mui complexos y hai veces que toes eses idees que yo quería mostrar difuminábense un poco nun quedaben tan clares. Y los temas que trato nos diferentes cuentos son temes que a mí impórtenme demasiao para diluilos nuna historia muncho más complicada. Entós quixe más tratar esos temes de manera mui pulida y concreta, un únicu tema por cuentu y escoyí esti formatu nel que tol conxuntu sigue una lóxica y un mensaxe común. Pero al final caún permíteme esplorar una temática, un mediu mui diferente a la hora de contar la historia.

–Esi nexu común xira alrodiu la vida y la muerte. ¿Por qué esa escoyeta?

–Lo qu' hai nel llibru ye una llucha contra aquelles coses que yo nun quiero escaecer, esas cosas que la muerte nun quiero qu'escaeza, les que son pa mín imporantes pa nun escaeceles nunca. Son reflexones sobre eses coses y, claro, nun hai nada que t'emburrie más hacia l'olvidu que la muerte, o que nun quede naide para recordarte una vez muerras.

Entós ye esa llucha contra esa fuerza de la naturaleza a la que toos nos enfrentamos porque tamién ye lo qu'hai.

–De los sos cuentos llama l'atención el procuru col que tán escritos, curiando cada detalle y la estructura de cada testu. ¿Qué imporancia-y da a esi llabor?

–A mín la narrativa propiamente y el trabayu d'escoyer les palabras que escribes pa tresmitir el mensaxe que quieres, ye un tema mui importante. Quiero marcar cola mio lliteratura una llínea entre lo que ye la charra y lo que ye la escritura. Como yo la entiendo, aporta la ventaya de que puedo dar vueltas a les palabres que quiero poner. Entós pa mi ye mui importante alcontrar les precises, soi mui obsesivu con eso. Tiendo a obsesioname con palabres y estilos que dexen mui abiertos a la imaxinación, pero que evoquen el sentimientu que yo busco. Y gústame dexar marxen al llector pa que faga suyu l'exercidiu d'imaxinar tamién un poco la so historia dientro de la historia. Ye una de les coses que me presta facer cuando escribo.

–¿Esi enclín obsesivu por llogralo tien de ver cola so doble formación científica y creativa?

–Eses dos partes, imaxino qu'influen bastante na mio manera d'entender la lliteratura. Per un llau, creo que deriva directamente de la visión más técnica que m'enseñaron nes carreres científiques. Pero cuando empecé a estudiar videoxuegos, una parte mui importante ye la interacción del xugador cola historia y hai un .

montón de decisiones técniques que t'emburrien hacia un tipu d'esperiencia. Entós ye lo que quiero intentar. Unas decisiones técniques que yo tomo: cómo escribo el relatu, el tipu de narrativa, qué persona uso, cuánto sabe, quién lo cuenta. Nun son estrictamente decisiones técniques, pero evidentemente condicionen abondo la esperiencia del llector. Cómo lu asities na escena ye un tema que m'interesa también, como m'interesa en cuantes a los cómics, les noveles, los visuales o el cine, cómo elixen el planu o cómotransicionen. Na lliteratura tamién hai los sos métodos y por eso-y doi tanta importancia a la forma, anque de xuro non tanto como me gustara facelo.

–Por cierto, como desarrollador de videoxuegos, ¿ve vidable producilos n'asturianu agora mesmo o un futuru cercanu?

–Eses coses son posibles si hubiere un interés por facelo. Yo taría encantáu de poder ayudar, tengo formación técnica pa echar un gabitu en cualquier aspectu del desarrollu.Los videoxuegos son caros de producir porque requieren un conglomeráu d'especialistes: programadores, diseñadores, 3D, xente de cámaras, dobladores, soníu. Ye costoso y después a veces los beneficios nun cuadren. Pero yo creo que nos temes culturales o d'identidá nun había mirase tanto pol beneficiu económicu. La cultura tien valir propiu y nun había mercantilizase. Si hai esa posibilidá, ya digo que taría encantáu de collaborar.